ǁNāpa-i ge !gôa!gôasa !auga!hūsi !nariǂoadi ǀguide senior mâisan ǂhanub din !aroma nî hâ, nēs ge kaise Namibiab di ǁhao!nâs !aroma a ǁkhīheǁkhōsa ǁhōn tsî ǁaxasin ǀguin !aromasa, presidenti berosa xu-i ra mîhesa !oa. 

Nē !gā!gās ge ǁnāpab ge !Hūb di ǁÛb, Nangolo Mbumbaba sîǂkhanisa a sîǂui, ministern tsî !nakaǂnôa ministern nî nēsi ǂgurose ǂâisa ǁîn di !hū!nāsi !ereamxasigu ai mâi tsî dītoahe nîse i ǁhōna sîsenǂamsa.  Nēs ge Alfredo Hengarib, presidenti mîgowaba-aob ra mîsa !oa ǂkhanuse ǀasa ǂhanub tsî ǂgaeǂguis 21 ǀKhūǁkhâb dis ai nî ǀnauǂgāhesa ǂgaeǂguisa mā!khunis ai mûba mâihâse ra dīhe. 

Hengarib ge mîs ge nēb a ǂō ǁaesa Namibiab !aroma tsî di ministeridi tsî ǂnûiǂgāde ǁîdi proxramga ǀamǀams ǀkha nî ǁaxasa, ǁawoǁawos hoan nî !amkuse !gûǁnâs dis ase. “ǂKhanin ge ǀnai ra aiǂhomihe. 

Dana !nurigu hîa ǁaxasin tsî proxramgu ǁnā ministeris tamas ka i o ǂnûiǂgās dina !khōǂgā hâgu ge ra māhe, ǀasa president-e ǂguro tsē daoba ǁguibas !aroma,” tib ge Hengariba ge mî. 

“Sîǂkhanis ge a sîǂuihe !aruǀî hâ !nariǂoade !auga!hūgu ǁga amǀams ǂgaoǀkhās ǀkha, xawen ge !khōǂuisa !khaide nî hâ !nariǂoade nî mā-amhesa, Namibiab a !hoa !hūbaisi !hūgu di !â tsî i ǀnî !nāde Namibiab dommi nî ǁnâuhesa ǀgapi !harigu ai nî hâ amaga. 

ǁNā-amagab ge president Mbumbaba ǁnā ǁ-aexa i karao, mîǁguiba nî ū,” tib ge ge mî. “Sada ge !hūǂnûǁkhaebade !kharaga !hūgu !nâ ūhâ, ǀhaob ai 34 !gôab dide. 

Hana-i ti nî hā tsîb Namibiaba nēpa xu sī nî ǂnûǁkhaebahe ǁoas kara, o-i ge nē !hūǂnûǁkhaebade xu !hūǂnûǁkhaeba-aon tsî komisaren xa dīhe ǁkhā îb sada domma ǁnâuhe ǁkhā,” tib ge ge mî. “President Mbumbab ge noxopa kai ǀhaode nî ǁhao!nâ. 

Aiǁgauseb ge Afrikab !Gaeǀhaos ǂNûsa Zimbabweb !nâ sī nî ǁhao!nâ. ǁKhātib ge SADCs ǂnûsa nî ǁhao!nâ ǁîs ǁawosasiba DRC mâsib xa nî !hoa!nâhese.