President Mbumbab ge ǂoa ge wekheb di Denstaxtsēs ai ǁîb di 13 ǁkhâga ge !khōǂgā hâ i ǂgaeǂguis !harosa, ǁîs hoan xa a ǁgoaǂuixa!nâ ǁaeb Namibiab tsî ǁîb ǁanǂgāsaben !aromab ase ge !gara!ā. Mbumbab ge presidentsis !harosa ǁîb ai!gû-aob, Dr Hage Geingob di ǁōǂoas ǀkha ge ū!khuni. Geingob ge noxopab sîsenni !nâ hâse 4 !Khanǀgôab 2024 dis ai ge ǀomǀuni. 

Mbumbab ge Geingob di koro kurigu sîsenǁaeba ǂoa ge wekheb Fraitaxtsēs ai ǀamǀam, ǁnāpab !hūb di ǁûsisa Netumbo Nandi-Ndaitwahs ai ge ǁkhaeǁnâs khao!gâ. 

“Tita ge ra ǂgom, ǀhûǀgui du nî !khaisa nē ǁaeb ge amabes !nâ ǁgamrogu di ǁae i !khaisa tsî ǁîb hoagu xa ge !khae ǁae i Namibiab aitsama mâbasens !nae!khaidi !nâ !khaisa. 

Nētsē, da ge nēpa go hā, ǁōǂoa ge sada !Hūb di ǁûb, Hage Geingob di ǂgaeǂguis kurigu di ǀams tawa, hîa ta tita kaise go !gom i mâsigu !naka a ǀamǀamma. 

Sada ge ǁkhāti nēpa hâ î da Hûǁî !Haosi ǂNûs di sîsengu ǀamsa !hara,” tib ge Mbumbaba ǁîb di tawede ǁnāxūs gowaǀîs !Haosi ǂNûs !nâb ge ūhâ is tawa ge mî. Mbumbab ge Namibiab kaise go !gom i ǁaeb !nâ ge ǂgaeǂgui, Hage Geingob di !napetama ǁōba 4 !Khanǀgôab 2024 dis ai hâ  tsî 8 !Khanǀgôab 2025 dis ai ǁōǂoas Namibiab !Huis Presidenti, Sam Nujomab disa. “ǂHâǂhâsa !khais ge, !gâi!gân tsî ǂoa!nâdi !kharu ge ǁaegu didi ka hâ, xawe da ge sada ǁaese ge mâǁawo, ais ǁga da nî !gû tsî ǀasa tsoatsoa-e dīse,” tib ge Mbumbaba ge mî. 

Nandi-Ndaitwahs di ǀnauǂgās Fraitaxtsēs ai ge hâ is, ǁKhaisaǁî !Haosi ǂNûs tsoatsoas tsî ǀasa tsoatsoa-e Namibiab !aroma a ǀhui-amsa. “Hâ a !khais ge, ǂgaeǂguisa ǀgui president-e xu nau-i ǁga mā!kharus, ǀgaisa demokrasis !gao!gaogu ti ai!gû-aogu ge ǁguiga ra !khō!gâsa. 

Sada ûi!nâ hâ ǁaeb !nâ-i ge president-i tsîna ǁhû!aohe tsî sâsase ǀhûhâsib !nâ a ûi ǁkhā,” tib ge ge mî. Nau ǂgiǂgo !nandi ǂgaeǂgui-aon tsîn ge ǁîn di tawedeǁnāxūde mā tsî Mbumbaba ǁîb di ǂgaeǂguiǀgaub !aroma koasa gere mā. 

ǂGaeǂgui-aob ǂhanusise ǂan!gâsa ǂgiǂgo!nans dib, McHenry Venaanib ge ge mî, Mbumbab a ǁnā ǂgaeǂgui-ao, !gom mâsigu tsî ǁaegu !nâ ge mâ!kharuba. -Nampa