Mbunga politika zaRepublican ndi RP kuna kutumbwidira asi nsene ngazigusa epangero, awo ngavatura nye nomina nomavango gopaungesefa nokugava marunone kovaNamibia. 

Mbunga politika ezi vana kundindira nazo zika lihamesere momahoroworo gana venye gana kuwiza mwa Mangundu 27, mvhura zeezi awo ngavatara asi runone rosirongo kurugavera kuhetakana, omu muna hamena ngoporo nayimwe ngoso kovaNamibia. 

Mbunga ezi kavageve nye paveta manifesto zawo moutatu wakapita, omu nye vana kutumbwidira asi runone tavakarugava kovanamvhrerwa navenye. 

Eyi yokukara asi kapi avayiwapukurura, ngwendi nomfi, mema ntani evhu kuna kara tupu kwavamwe ntani kapi avayiwapukurura ngesi yahepa kukara nye yovantu vene.

 ‘’ Kutunda tupu apa sirongo samanguruka, vaNamibia kwavavaka uhwi wawo, nomiliyuna nonomiliyuna nokampani davamwe ntani vantu pamundinda ava vakara hena asi kugwana uwa kepangero. 

RP apa nye navagusa epangero awotavawapukurura mavango nagenye gounangesefa, nayinye oyo yahepa kupitira monotenda, eyi ngayininkisa nye epangero lisesupike eyi ava ruganesa yimo zina kutanta manifesto zawo. 

‘’ Wokukwata nomfi ntani vanafarama gona simpe ngavatwikira kugwana nombapira vakwate nomfi dokuyalya tupu membo. 

Awo vahepa kuvapulisira vakwate yipo valye vaparuke. Yimo zina kutanta RP. 

Awo simpe kuna kugwedako asi kapi ngavakapulisira nombunga douzuni ndi yikepa yiwize yiyakwate nomfi momema gaNamibia, yipo asi kukwata nomfi yahepa kukara mevhu lyaNamibia. 

Eyi ngayininkisa asi kwato kukwata nomfi pwahana asi paveta, ministeli zonomfi ngavazipa nonkondo nokukara nodira zavene vakeverere nokudingura mema gaNamibia. 

-Nampa