OTJINENE – Presidentegona gombunga zaSWAPO age hena yige candidate gwazo momahoroworo ogo gana kuwiza Dr. Hage G. Geingob katente asi kuna kumoneka asi vakadi vanzi vana kara vakandidate momahoroworo aga vana yuka momukunda gwaOtjinene. Geingob kageve kombunga madina aga nokuvatantera asi mbunaga politika zaSWAPO, hawe kuna kara vakadi vantatu ano vagara vavali. Vantu ava vakara asi kwalituramo mweyi yoparudi vharwa kunakutanta asi vakadi vahepa kuvahorowora momavango goumpitisili paupolitika. Age katente asi nopersenta 60% kuna kara dovakadi ano edi 30% kuna kara nye dovagara, ava vana kara asi pelikwamo lyombunga zendi.
Vakadi ava vana kara asi vakandidate momahoroworo aga kunakara vakadi Betseba Kamuhenuma, Nono Tjiueza na Diana Kakwara ano vagara ava vavali kuna kara nye Assaria Tjingaete naJoshua Kahikuata. Kakwara age muduni yiro rudi rwendi oru rwakara asi kwavaninkiliramo.
Kuna kumoneka asi mbunga politika zaSWAPO nazikara zina kugava sihonena omu vana kara negano lyokuretamo vakadi moupolitika eyi yina kumoneka asi nombunga nadinye dahepa kukwamamo monzira ezi. Tjiueza age mukurona sure mosure zimwe moOtjinene ntani age gombunga zaSWAPO, mugavi nombudi nomapukururo momukunda Otjinene. Age katente asi ktunda unona wendi kwakulira mombunga zaSWAPO. Age kunagana asi ngaruganena mbunga zendi dogoro nomfa dendi. Tjiueza ogu ana kara ngesi asi moumpitisili wopamukunda wombunga zendi kuna kulizuvha uwaawa kukara asi vana mutumbura wombunga zendi.
Mbunga zaSWAPO tazi karumbasana nonombunga edi DTA ntani NUDO, momukunda gwina.Mukunda gwina kuna kara novantu valitjangesa vakahorowore wokusika ko 2000mokukwama munambudi gatunga modoropa zaGobabis, nokugwedako asi mukunda Otjinene poupolitika kwakara momuwa kwato moumbondo nkenye. Apa nye kauyungisire mbunga zendi momapeu ganapuko Geingob kahundilire vakahorowore mbunga zaSWAPO, morwa velike vana kara nomagano ndi nelituromo mokutekura vantu. Age kahomokerere yimbungapolitika gona asi kapi ava uyunga usili apa ava gava makuye gawo gombunag mpangalizaSWAPO, nkenye gumwe kunakuyimona asi mbunga zendi kuna kulike sirongoesi momukaro gomuwa. Nokutanta ko yimwe asi mbunga zaSWAPO kwatunga nosure, yipangero, nonzira nado kwadirugana ntani mwana yinye tupu hawe vantu eparu lyawo moNamibia kuna wapa ndi asi lina litjindji.