Swakopmund- nompitisili daSWAPO, kavahundilire vahameni vawo kumwe nomukwatakanesi gombunga vatamunune kuhanesa mbudi komeho zomahoroworo govakansela wonomukunda ntani ndango zonodoropa gana kukakarako mokwedi kooku. 

Mbunga politika kazikere nepongo mevango lyokukarera yigomngi kumwe nonompitisili ngwendi Wise Immanuel, Veikko Nekundi ntani Natalia /Goagoses momapeu pita pevango vana kutumbura asi Multi-Purpose Centre. 

Apa kahuyungisire vahameni novakwatesiko Nekundi katente asi mahoroworo gana kuwiza naga katjangurura mukaro gombunga politika moErongo. ‘’ 

Ose kuna kusika nye momahoroworo gondango zodoropa ntani ndango zomukunda horowero. Eli ezuva nye ngalikatugaununu pokatji kovagara novamati. Eyi kuna kara nye yetu natuvenye yilyo yombunga ezi omu nye natuhuyunga natuvenye yokulifana yipo nkenye gumwe azuvheko asi yinke nahorowera mbunga zaSWAPO, yimo ana kuyitumbura ngoso. 

Nekundi kagwedereko asi vahorowoli vahepa kudiva asi yinke yirugana yaSWAPO, mosirongo esi yanare neyi yantani ntani kweyi nye tuna kugazara yokomeho. Age katente swapo kumuhorowora morwa masanseko age kweyi garugana, nye gahepa kumudiva nokumuhorowora morwa eyi anakurugana ngesi nokomeho oko. ‘’ 

Tuzeni tunda embo zende embo. Owo vana kara novagara vawo ndi vakadi vawo tulitantereni tukahorowore swapo kwahana nomuga kwahana hena utjirwe,’’ yimo ana kutanta. Nekundi katente asi vatungimo moErongo, navakara nye nombangi kweyi yahoroka neyi yina kuhoroka ngesi apa vatokwere asi aw okapi vana kuhorowora hena mbunga zaswapo momahoroworo aga gakapita, tutareni tupu asi nodoropa ngapi dina fana. 

Age katente nampili wowo nye vana kugendesa nodoropa ngesi koveli vana kusivanene swapo, nampili ngomu vana kara asi yiwo vana kupangera. ‘’ Eyi yiyonye ayi horoka nsene tokaduka nye ove kapi walirongikida nawa nawa. 

Ove ngoso kuna kara ngwendi kuna kuruganesa muntu ogu vana pilire kuhampuruka mompitiusili. Ngesi sina sikinye siruwo sokutanta asi tatu tengwida Swakopmund kombunga zetu zaswapo moErongo kooku zawapera kukara,’’ yimo ana kugava matjingiso ngoso. 

Kwato vanyengi 

/Goagoses age kahundilire vahameni vaswapo asi twahepa kukara tunalikwata kumwe ntani tukare nononkedi. ‘’ Mbunga politika zopaveta, kapi tuna hepa kukara novanyengi vetu. 

Kapi tuna kara nonombunga mpatanesi. Eyi tuna kara noumbangi monomvhura edi 25 tuguse vantu vetu moruhepo tuvarete mewogo. Udigu tuna kara nawo nyamwetu. 

Hompa Karunga gahepa kutupopera tutware vantu vetu kefundo lyombunga zetu,’’ yimo ana kutanta. Age kahundilire vakwatesiko vatengwide vantu navenye ava ngavahorowora mbunga zaSWAPO. ‘’ Tukondjeni unene, tuze tunda embo zende embo, tukatengwide vantu ava vazire kopeke vapukisire, yipo nye asi vawize ntani vayahorowore mbunga zaSWAPO, yimo ana kutanta ngoso. –edeklerk@nepc.com.na