MBUTUTU ya lilimo ze talu ne kile ya tiba mwamezi a munda mwamazazi a cwale ni kutisa palo ya batu bese ba bulailwe ki mezi a swana a munda tuna o, fa palo ya batu ba supile. Mezi sa tutisize bayahi ba n`ata ni kutibisa masimu a man`ata a batu ba shelana ba sikiliti sa Caprivi. Detective Inspector Christopher Kalimbula Masule ki yana nitifalisize kaza simpangaliko sa maswabi sa cwale seo kuba mutende o, ka kutumusa libizo la mbututu kuli na zibahala ka Ntwala Simasiku yana kile a tiba muta a ‘fufiswa’ ki mezi ana halifile hahulu inge a pepilwe kwamukokoto wa mahe mwanako ya maswabi yeo. Mufu na inzi mwalieto ni bashemi ba hae kaufeela mwanako ya simpangaliko-tuna seo inge kuitusiswa nzila ya mezi ka mukolo wa kubeta. Mukolo no tibile ni ona kasamulaho wa lin`ungwa ni mandinda tuna ao. Muta mukolo ni mbututu li tiba, bashemi bona neba konile kubanduka kozi-tuna yeo ka kutapa. Simpangaliko nesi ezahezi mwanako ya musihali mwalihola za 16h00 mwasilalo sa Kasika. Lubasi nelu zwelela mwamunzi wa Makoma mi nelu libile kwamunzi wa Kasenu ka kusebelisa nzila ya mezi ka mukolo, ili nzila ye tumile hahulu mwanako ya silimo ya cwale ye, mwalibaka zani sina mikwakwa kaufeela ya limbayambaya hase i apesizwe kale ki mezi a munda a. Mufu na kile a beiwa swale-lele mwandu ya lipumulelo ya kwaNgoma ni kulitela lipatisiso ze tezi za mapokola zeta tatulula ka kutala kaza sene si tisize lifu. Mwasunda ye felile ka mazazi a mabeli, mezi na yemi feela kulo kuli kun`wi hana kilwe a pimwa. Bayahi baba sepahala neba kile ba lumela zebe mutende o hape kuli, mezi sa fitile nifa mutano wa munzi wa Bukalo. Licaziba neli kile za nuha kale kuli mezi ata nanuha haisi fa lilima ze lobapeli (8). Ba mubuso neba lumelezi sikwata sa licaziba hape kuli li eze lipatisiso za sona za mafelelezo. Kwalineku le lin`wi, katengo ka Makwambuyu neka tumusize kale sikuka sa kufa lico za linanga kwabatu ba ba taselizwe ki likayamana le. Ha ki lico feela kono mane ku sana ni matente ni milyani kapa ona mapilusi a kenisa hande mezi a kunwa hala lisebeliso zen`wi zeta fiwa kwabayahi ba.