< Paulina Ndalikokule
Omupopiliko guuministeli womidhingoloko, omakuti nomapashiyono Romeo Muyunda okwa ti nonado oshikukuta shomvula yonuumvo moNamibia osha dhenge woo iinamwenyo yomomakuti kolutu inashi dhenga koomwenyo oshoka inaya koneka natango iinamwenyo ya si koshikukuta.
Muyunda okwa thana ndhoka sho a yamukula omapulo gaKundana ohela, ta ti omuloka gonuumvo ngoka inagu gwana momahala gi ikalekelwa giinamwenyo ogwa eta ompumbwe yomeya nomwiidhi kiinamwenyo mbyoka.
“Ngashiingeyi otu li twi ipyakidhila nokukonakona kutya oshikukuta osha dhenga shi thike peni momahala giinamwenyo agehe. Otu shi shi lela kutya omeya nomwiiidhi otagu nyangwa momahala moka,” Muyunda a ti. Ta ti uuministeli otawu ningi oonkambadhala okukaleka po omwiidhi nuumeya mboka wu li po nokuyaha po iinamwenyo yimwe ngele yili pehala ya pitilila unene shi vulithe omwiidhi nomeya ngoka ge li po.
Muyunda okwa gwedha po kutya otaya longele kumwe nombelewa yomuprima osho wo Meatco opo ya gandje onyama ndjoka kaantu mboka ya gumwa koshikukuta moshilongo.
“Mokuninga ngeyi otatu vulu oku ku kandula po uupyakadhi womeya nomwiidhi inagu gwana, okuhwepopaleka omwaalu gwiimanamwenyo osho wo okugandja onyama kaakwashigwana yetu mboka taya si ondjala moshilongo ashihe. Otatu gandja wo omeya kiinamwenyo momahala ga gamenwa.
Oshiholelwa shimwe ooshoka shoondjambameya dha li tadhi si enota sho mokadhiya moka dha li hadhi kala ka kukuta koZambezi, uuminsteli ngashiingeyi owe dhi fulila omboola ndjoka tayi kala tayi pombele mo omeya mokadhiya moka.
Otwa inekela kutya shika osho shimwe shomiinima mbyoka uuministeli wa ninga mokukondjitha oshikukuta kiinamwenyo yomokuti,” omupopiliko ta ti.
Omasiku ga yi iifo oya kundaneke kutya aantu yaali oya kanitha oomwenyo dhawo sho ya dhipagwa koondjamba, aantu komalungula oya kala taya ti anuwa iinamwenyo otayi yi popepi nokuyonagulapo omalukalwa nomapya oshoka oya lulilwa koshikukuta momahala g agamwena. Ashike ndhoka Muyunda okwe dhi ekelehi ta ti iinamwenyo ohayi kala tayi ende nonando kashi shi omimvo dhoshikukuta.
“Oshili ooshoka kutya moomvula dhoshikukuta omakodjithathano pokati kaantu niinamwenyo ohaga kala po oshoka aantu niinamwenyo ohaya kala taya kongo iikulya nomeya,” ta ti ngaaka.
Muyunda okwa kumagidha mboka ye li popepi nomahala giinamwenyo yomomakuti ya kale uupathi ethimbo alihe.
“Otatu indile aakwashigwana kaaya kale taya endaenda uusiku, okwiiyoga nokuyoga momilonga osho wo okuthiga po iimuna yawo inaayi tonatelwa,” Muyunda a ti.
MuMaalitsa nuumvo, uuministeli owa li wa lopota kutya iinamwenyo momakuti okwa li tayi shuna pevi molwetetepo lyiihwa osho wo elunduluko lyonkalo yombepo.
Uuministeli owa li wa kundaneke woo kutya oompanda 67 noondjamba hetatu odha yahwa shaa li paveta omumvo gwa za ko, nuumvo oompanda hetatu odha yahwa nale shaa li paveta manga omimvo omulongo dha ka pita moshilongo omwa lopotwa iipotha 631 yomayaho giinamwenyo shaa li paveta, oyindji oya lopotelwe mo2022.
Caption: Omupopiliko guuminisiteli womidhingoloko, omakuti nomapashiyono Romeo Muyunda.
Efano: New Era