Festus Hamalwa
Omukulunhuwiliki welyenge lokulwifa oimbuluma loMen & Women Network Nestory Moses kwa hokolola ta ti otava ka ninga oikonga yokuyandja omayakukulo exungomwenyo kovanyasha hava kala ve na omhepo okulikufa eemwenyo.
Okwa ti elalakano okukelela ovanyasha vaha ninge oihakanwa yokukala tave limangeleke ngeenge tava hepekwa koupyakadi wopamadilaadilo.
Moses okwa yelifa ta ti ongudu yavo itai lalakanene ashike okulwifa oimbuluma moshitukulwa ndele otai lalakanene yoo vali okukala tai yambidida ovanhu tava hepekwa koupyakadi wopamadilaadilo unene ovaholafani.
Okwa lombwela Kundana ta ti ovaholafani ova didilikwa hava kala tava dipayafana noshoyo okulidengafana eshi shi li tashi dana onghandangala mOhangwena.
Onghee okwa ti otashi ka kwafela ngeenge ovanyasha tava ka pewa ouyelele nehongo kombinga nghee ve na okukala tava ka konga omakwafo keembelewa davo doNetwork. “Ongudu yetu nayo oina ovaxungimwenyo noshoyo ovafitaongalo hava yandje omayakulo exungumenyo noshoyo ehongo kovanhu ve na oupyakadi wopamadilaadilo. Onghee oshiwana nashi kale sha manguluka okukala sha kwatafana neembelewa detu da yooloka,” Moses ta ti.
Okwa ti osha fimana opo va dule okukala va kandula po omukundu wovanyasha vaha ninge oihakanwa yokuli mangeleka unene tuu ovalumenhu.
“Ovanyasha nava manguluke okukala ve uya keembelewa detu opo va konge omakwafo shaashi oku li mangeleka ka kushi e kandule po lomukundu ndele oshi li eta po lomukundu momapata avo,” Moses ta ti.
Okwa ti ongudu yoNetwork yavo oina eembelewa 243 di li momikunda da yooloka mOhangwena mwatekwalwa ombelewa yavo ya kula ei ili pOngha.
Moses okwa weda po ta ti ongudu yavo yoNetwork ohai yandje omakwafo a yooloka koshiwana ngaashi oikulya, ovanhu ve li momhumbwe yoindjalomwa noshoyo okuyambidida ovakulupe neefiye.
Okwa kunghilila oshiwana opo shi twikile nokulongela kumwe mokukondjifa oimbuluma nomahepeko omomaumbo.