ONANDJOKWE – Kapyoko kokupanga omesho Dr Helena Ndume okwa ti oha kala a hafa ngeenge ovanhu ve na omesho e na oukolele osho yo ve wete ko nawa shaashi osha fimana mokukalamwenyo kovanhu. 

Pefimbo ta tande ovanhu mwa kwatelwa ovakulupe koshipangelo shaNandjokwe Etitatu okwa popya ta ti okupanga omesho oshipewa shaye osho ha ningi okudja komutima shaashi oku na ohokwe yovanhu. 

Ndume okwa ti ovanhu 500 otava kala va mona ouwa wokupangwa omesho koshipangelo shaNandjokwe. 

Omundokotola Ndume ota longo oshilonga shiwa ngeenge tashi ya mokupanga omesho. 

Okwa ti omudo keshe oha ningi oshikonga shokupanga omesho melongelokumwe neendokotola hadi di kondje yoshilongo. 

Ovakulupe ovo unene hava holoka momwaalu muhapu okupangwa omesho shaashi ohava kala ve na oupyakadi wokutwika. 

“Ohandi lalakanene opo ovanhu ve na oupyakadi wokuhamonako va kale ve na omesho e na okulongelele,”ta ti. Okwa ti omwedi wa dja ko natango okwa li a ninga oshikonga shetando lomesho koshipangelo shaShikuku. “Osha fimana ngeenge omunhu ovanhu ve wete ko opo va dule okulonga oilonga yavo komaumbo. Omukulupe ngeenge okuwete ko ota dulu okutunga oimbale yaye,” ta ti. Ndume okwa kumaida oshiwana opo shi xulife po okupukifwa keengeleka kutya inashi nwa vali omiti davo domapango a yooloka. 

“Omiti oda fimana molutu opo ovanhu va aluke,” ta ti. -fhamalwa@nepc.com.na