Auleria Wakudumo
Ouministeli womidingonoko (MET) owe li pyakidila oku xupifa eendjabameva di dule 130 odo dili monhata koMunambeza popepi no netale hali ifanwa Lyambezi molwa omeva a pwiinina mo.
Ouministeli owafa eeboola ponhele opo u dule okupombela omeva mondobe omo mu na eendjabameva oo a fike koshilemo. Munambeza omo mwa damena eendjabameva ondobe onhinatu ili lwokomulonga waChobe komunghulo weengaba daBotswana.
Omupopiliko wouministeli womidingonoko, oixwa nomapashiono Romeo Muyunda okwati otava kendabala okuninga keshe osho tava dulu opo eendjabameva odo diha wede komwaalu waado dafya nale okudja Etitano.
“Eshi hatu konaakona apa inashi fa oshiningwanima shokoLungala, oko kwali nako kuna eendjabameva da a nyena monhopo noshali shidjuu okukwafela ashike otweli dopa mo ashike opo tu kwafele. Eendjabameva nonande da a nyena monhopo, odili monghalo tai dulu okukwafwa osho twa ninga nale nokuli shaashi eendungu oda fewa nale kouministeli womidingonoko opo tu dule okupomba omeva okuya meepond omo muna eendjabameva da pumbwa ekwafo,” Muyunda ta ti.
Muyunda okwa weda po ta ti Namibia okuna elao osheshi okudja komukokomoko woshikukuta fiyo opapa, eendjabameva ashike nhano da lopotwa da fila mondobe yonhata. Eendjabameva nhatu da kula odafya okudja Etitano loshivike sha dja ko na dimwe oda fya momukokomoko wexuulilo shivike.
Muyunda okwa londwela ovakwashiwana vomeenhele omo eendjabameva da fya opo vaha lye ombelela yeendjabameva manga ouministeli tau ningi omapekapeko eli xwa po kutya oshike sha etifa efyo leendjabameva.
“Ohatu feekele eendjabameva dafya kombulwa shaashi ngeenge omeva okwa ninipala ndele taa pwiinine, okumito yokukwatwa komukifi wekondo nelaka ouli pombada. Nongeenge owa tale ponhele apa pena eendjabameva edi, kapena omwiidi wa wana, osho tashiti eendjabameva otadi dulu okufya yoo kondjala,” Muyunda ta ti.
Omboola ya fewa koMunambeza vati oili nale peemeta 45 moule, ashike oya teelelwa vati i fike peemita 50.
Muyunda okwa kunghilila ava hava di popepi noinamwenyo nohava longifa omeva omeemboola, opo vaha shinde nokuhandukifa oinamwenyo.