LUHONONO – Mueteleli wanaha Hage Geingob ubulela kuli kuyaha mikwakwa kikwabutokwa hala kutisa silelezo ni zwelopili. Nabulezi manzwi awo kanako yakukwalula simubuso mukwakwa waNamalubi-Isize-Luhonono, ili wabutelele bwalibima ze52.
Geingob naize muuso uitamile kuyaha ni kulukisa mikwakwa mwanaha, kamulelo wakubata kuhulisa mayemo asilelezo ni sifumu mwanaha. “Buitamo bwaluna mwakuyaha ni kulukisa mikwakwa, busupeza pono yaluna yakubata kuhulisa naha sina moibulelela Pono 2030, ni milelo yakubata kutisa zwelopili yanaha ili yeiputezi mwa HPPI ni HPPII,” nekubulezi Geingob.
“Kacwalo nina ni sepo yakuli purojekiti ye, yene sulezwi masheleñi kakutala alikana bolule bamyanda isupile kimuuso, ikatusa bayahi baLuhonono ni lilalanda zaKabbe yaMutulo ni Mbowela kuitenga mwalitaba zalipisini, ili kuli bafumane masheleñi akuitusisa,” nekuhatelezi mueteleli wanaha. Mukwakwa ili obatoswana ni mukwakwa waMongu mwanaha Zambia, upazulula mabala amuunda aKabbe yaMutulo ni Mbowela, kuanungahanya kwamutunda. Mukwakwa nonyatezwi kasilimo sa 2014, kono nolyehile kufela bakeñisa butata bwa muunda. Kwamulaho bayahi nebakatazeha kanako yapula ni muunda.
Mueteleli wanaha sapili Hifikepunye Pohamba, ili yana kalile purojekiti naize nasalumeli kuli mukwakwa nokona kuyahiwa mwamabala amuunda. “Hane nifufanga ni polopela sihulu nako yamuunda nekubonahala feela mezi kai ni kai. Kono fokuna ni takazo kuna ni nzila. Neluna ni takazo kuli Luhonono inungahanywe kwa Katima, mi taba yeo iezahezi,” nekubulezi Pohamba.
Ngambela waMasubia Albius Kamwi nasakoni kupata tabo yahae hala kuyahiwa kwamukwakwa, mi nazie zwelopili yenca kona toloko sakata yakutisa lika. “Kamukwakwa wo lwa utwisisa cwale toloko sakata yamoya wanaha Namibia,” nabulezi.