RUNDU – Muuna walipisinisi mwa silalanda Peter Immanuel, ubata kucinca mubonahalelo wasibaka sa poniso ya litaba za sizo, silalanda ni maikatulusezo sa Maria Mwengere, sesi zibahala halulu mwasilalanda kalibizo la ‘Likongoro/Ekongoro’, kusifetula sibaka sa lituto za naheñi ni bupoti. 

Muuna walipisinisi nazibahalize milelo yaku uta likwena kuli akone kutiba lisuba mwahala sicaba ni lihahabe zebuhali zepila mwa nuka ya Kavango. “Kuna ni lipiho zeñata mwa sikiliti saluna za kuswaliwa ki likwena, zeñwi zakonwa kutibelwa haiba batu inge bafiwa lituto. Likolo likaba ni kolo yakutisa baituti mwahala lizazi kuto ituta zamikwa ya likwena ili taba ye kabatusa habali kwanuka,” nekubulezi Immanuel. 

Mulelo waku uta likwena niha ubonahala kuba pisinisi yetuna, Immanuel nahatelezi kuli mulelotuna kisilelezo ya sicaba, tuto ni kutahisa misebezi. Musebezi wakuyaha ukalile mi kasa molikana li ina likwena kayahilwe mi kaitukiselize kusebeliswa, mi purojekiti ifumani tumelelano ni mutayi watuto ni katengo kasikiliti sa Kavango. 

“Nihaike kuli sapili mulelo neli kuleka likwena kwa Otjiwarongo, Likolo la Silalanda, Mishitu, ni Bupoti li itukiselize kuneula lihahabe. Nihakulicwalo, purojekiti ilyehile hainyani likolo halisa feleleza kulukisa litaba zakuneula ni kutambeka likwena. 

Kanako ya cwale bayahi balikiliti za Kavango ya Wiko ni Upa batamanga musipili walibima zeñata kuya kwa Otjiwarongo kuyobona likwena zekwalezwi. Immanuel ubata kucinca taba yeo kakutisa “lihahabe zesabisa” zeo bukaufi ni sicaba ni bazamayi mwa Rundu. 

Hakubapanywa ni mwanuka teñi likwena lihasani feela, kwa sibaka seo batu baka kona kuli bonela fakaufi nikuituta za silelezo nako kaufela. Immanuel yana ni lipisinisi zeñwi za zamaisa li Matapelo aRundu (Rundu Beach) ni malonji alonga batu, ubona kuli kalulo yeo ikaba kuyandulula bupoti mwasikiliti. 

-jmuyamba@nepc.com.na