Epukiro- ministeli zonondima kavageve mbudi asi awo kuna kukatamununa siruwo omu vaweki yimuna navaturamo mahundiro melikwamo eli lyokuvatera vana ndima mokuvapako nsonso. 

Vanafarama ngesi kuna vape siruwo asi dogoro mwaKudumogona, 30, 2025 vaturemo mahundiro gawo unene aga gakara asi kapi vagaturamo. Ezuva eli lyakare lyokuhulilira kuturamo mahundiro aga kwakere 30 Nsinano 2025. 

Ntumwaraka kavageve momandaha kupitira modarectorate zonondima moruha ntani rounkurungu kavatente asi awo kuna kuhundira vanandima vaturemo mahundiro gawo kutunda nye mwaKudumogona 1, 2024 dogoro mwa Nsinano 31, 2025, vaditware nye ponomberewa dopopepi donondima. Elikwamo eli lyokufutako nsonso kovanandima, kuna hamenemo kugwanena vana ndima marandesero, ntani kufutako kougendero oku vana kutwara nokuvanakutunda. 

Kugwedako, kuna karako hena nsonso zokufuta kwava vana kara nomavango gokulisira, wayi wonongombe yiyo yimwe muntu novhura kutura moyo ono kugava koministeli. 

Ministeli kazigeve asi vahepa kugava nayinye oyo kovarugani konomberewa dokulisiga siga omu navagava mbatero kovanandima yipo vayirugane kwahana matangayi. ‘’ Kuna kara tupu mahundiro nagakara noyimbapira youhunga yigo natuvhura kutambura,’’ yimo zina kuhagara ngoso mbudi. 

Elikwamo eli lyokufuta vanandima kuna hamenemo kurugana ngesefa nonongombe, yikombo ntani nonzwi. Ava nye navagava yimbapira youhunga tavagwana nye N$750 moyimuna yoyinene ngwendi ngombe, yina kara nye asi yisike ko 75. 

Kweyi nye yoyinunu ngwendi yikombo nonzwi, awo tavagwana nye tupu N$150 mosimuna, ano ayo yahepa nye kusika ko sivaro so 375 yikombo noyikapa, ndi kuyipakerera nayinye. –Nampa