Okakomishi komahoololo koECN oka pula eengudu dopapolitika opo di yandje omadina ovanhu ovo tava ka kufa ombinga momahoololo oukansela koshikandjohoololo shaGuinas.  

Edi oda popiwa onghela momukanda pitiki wa dja kombelewa yomupopiliko woECN De Wet Siluka.

Oshikandjohoololo shaGuinas oshi li moshitukulwa shaShikoto.

Omahoololo ota ningwa sha landula efyo lakansela ou kwa li ta wilike oshikandjohoololo shaGuinas, Elias Barney Martinus.  Martinus okwa xulifa mepupi lomido 51, omwedi Okotoba koshipangelo shaTsumeb.

Okwa ulikwa a ninge kansela omudo 2020.

Martinus oye umwe kwa li elitulamo okuyambidida nokuyambulepo oshiwana shovayelele moshikandjohoololo shaye.

Kansela okwa li alushe a yandje oikumbafa koshiwana shi li moluhepo pefimbo loutalala.

Ovanhu vahapu ova mona ouwa okupitila mombelewa yakansela ngaashi okupewa omaufemba nomidjalofikola dovanafikola.

Siluka okwa yelifa ta ti omahoololo ota ka ningwa momudo tau ya momafiku 17 Januali.

“Efiku la xuningwa lokuyandja omadina koECN omafiku 21 omwedi potundi 11h00 yongula. 

Omadina naa yandjwe pefimbo opo ku kelelwe eengudu dopapoliti diha ka nyenyete kutya ina di pewa omhito yokuyandja omadina ovanhu vavo,” ta ti.

Okwa popya ta ti eengudu ashike dopapolitika odo da shangifwa pambelewa koECN ta di kuka ombinga komahoololo oukashela.

Siluka okwa ti omunhu ta ka kufa ombinga komahoololo okwa pumbwa okukala e na omido okutameka 21, na kale Omunamibia ye oku na okakalata komahoololo.

Okwa kumaida eengudu dopapolitika opo shi wanife po oipumbiwa tai pulwa koECN noshoyo oku li ufa komilandu da tulwa po. –fhamalwa@nepc.com.na