Victoria Kaapanda
Okanona komimvo ntano okasi sho ka gwile mokaanala komeya, moshitopolwa shaMusati.
Sha ikolelela komukuluntu gwopolisi moshitopolwa shaMusati Moses Simaho, oshiningwanima shoka osha holoka momukunda Uundombo moshikandjohogololo shaElim. Otaku hokololwa kutya okanona hoka oka li ka gwile momeya pethimbo kwa li ya ka teka omeya nayakwawo.
Ta ti, aanona mboka okwa li ya tumwa ya ka teka omeya kokanaala komeya hoka kake li kokule lela negumbo lyaandjawo, nokwa li ka thengukile momeya.
Okanona kamwe hoka ka li na Mukwiilongo oko ka li ka ka tseyithila aantu kolukanda, sho ya kathika oya adha nale okanona ka sa, nonando oya li ya pondola okukakuthamo momeya. Ta gwedhapo kutya opolisi sho yathiki oya adha nale okanona ka sa. Nakusa okwa tseyika nedhina Atanasius indileni Mukwiilongo.
Aakwanezimo oya tseyithilwa. Shoka oshikando oshititatu omuntu ta si omeya muule wiiwike iyali ya landulathana moshitopolwa shaMusati, nonando opolisi ya kala noku kumagidha oshigwana nkene shina okukala tashi uhumbata okuyanda omaso goludhi ndoka.
Oshiwike sha zi ko omulumentu gwomimvo 30 Wilbard Iita Elago Mweshininga okwa li a si omeya momundhingoloko gwoRuacana, moshitopolwa shaMusati.
Simaho okwa ti, Mweshininga okwa li iihulwa okumoni Etiyali lyoshiwike shoka omanga inaa monika. Ta ti, olutu lwaMweshininga okwa li lwa itsuwa lu li kombanda yomeya mo kanala, momukunda Omutsewokanala. Natango shoka osha holoka ashike omasiku omashona okanona komimvo ne Amon Pombili Kasper, ka si omeya momukunda Oshipanda moshitopolwa shaMusati.
Otaku hokololwa kutya olutu lwaKasper okwa li lwa monika sho kwa li kwa ndhindhilikwa okahauto a li ta dhana oshowo oongaku dhe, dha li kombanda yomeya mokanala hoka ke li popepi negumbo.
Ta ti, Kasper okwa li anuwa a thigwa megumbo komukuluntu ngoka kwa li e li nayo megumbo nayakwawo yane megumbo aakuluntu kuye, ye li pokati komimvo 16 oshowo 17.
Omukaleli omukuluntu anuwa okwa li a yi a ka longa koshikunino, e ya thiga mo ayehe megumbo. Ta hokolola kutya yakwawo mboka okwa li ya zi mo megumbo, ya ka dhana etanga, anuwa, ihe kakwa li yena ontseyo ngele Kasper omo e li megumbo, nayo okwa li ye shi okwa li a yi nomukuluntu ngoka a li nayo megumbo.
Anuwa aanona mboka sho kwa li ya galuka kuudhano, kakwa li ya adha mo omuntu megumbo, okwa li ya dhengele omulumentu ngoka taya pula ngele oku li naKasper, ihe kakwa li ye li naye.
Otaku hokololwa kutya okwa li kwa tamekwa okukongwa sigo ya landula oonyolo dhoongaku ndhoka kwa li dha hulile pooha dhomeya gokanala. Olutu okwa li lwa hadhwa momeya okuza komatango golyOmakaya sigo Osoondaha. – vkaapanda@nepc.com.na