Festus Hamalwa
Omulumenhu weedula 49 okwa kwatwa po eshi vati ta ku fekelwa kutya okwa vaka ombelela yongobe ndele ta twaalela inamweno. Ombelela oya hangika ya tulwa mokila mondingosho molukanda Oneshila mOshakati konima eshi omukwashiwana umwe a lopotela opolifi Olomakaya efimbo lokonguloshi.
Omufekelwa okwa hangika keumbo lainamwenyo nokwa kwatwa po efiku tuu olo. Omupopiliko wopolifi moshitukulwa shaShana Inspector Thomas Aiyambo okwa hokolola ta ti konima eshi omufekelwa a kwatwa po okwa ningilwa omapulapulo kopolifi ashike okwa anya okuyandja ouyelele kutya ombelela okwei hanga peni.
Onghee naashi osha eta opo opolifi i kale tai fekele kutya pamwe omufekelwa okwa vaka eengobe dovanhu ndele te dipaa nokutwalela inamwenyo.
Opolifi oya hokolola tai ombelela otai ulike kutya oyadja keengobe mbali da yooloka shaashi oya etwa ina omakondo nomitwe ina di fafana.
Vati inamwenyo womufekelwa eshi a pulwa kopolifi naye ina yandja ouyelele kutya ombelela oya dja peni ashike okwa ti okwa mona ashike oshitenya she uya tashi ti kutya oshe mu e tela ombelela a kale ta landifa okapana kaye pondingosho.
Opolifi oya ti inamwenyo ina kwatwa po ashike ombelela oya kufwa mo mokila meumbo laye noi li paife koshitaashi shopolifi.
Omufekelwa okwa dile komukunda Ongha moshitukulwa shaHangwena nota hokoloka momhangu yaShakati Etivali eshi ta pangulilwa oshibofa shoumbudi woimuna.
Opolifi otai indile moshiwana kwau a kanifa eengobe daye opo shi kale sha talela po oshitaashi shopolifi mOshakati opo shi ka tale ngeenge ombelela oyadja keengobe davo.
Opolifi oya kunghilila oshiwana opo shi kale tashi twikile nokuyandja ouyelele kopolifi kombinga yoimbuluma tai ningwa momidingonoko davo.