OMATANDO – Omulumenhu weedula 33 okwa langulwa noikulumbwati kovakwashiwana pefimbo a li vati ta kandebala okutwa omunafikola nombele nokunyeka ko ongodi yaye.
Oshiningwanima osha ningwa mOmatando mOngwediva onghela moshanga shomutenya.
Omufekelwa okwa patululilwa oshibofa, okwa kwatwa po nota holoka momhangu nena. Omukainhu weedula 20 ha fikola koshiputudilo sha-IUM mOngwediva okwa hokolola ta ti okwa hangika e li mondjila a uka kofikola, eshi a shakena nomulumenhu oo.
“Okwa nhukila nge, nokwa ningila nge omatilifo ta ti ota dipaa nge nombele ngeenge inandi mu pa ongodi yange, okwa pula nge yoo vali ngeenge ondi na oimaliwa. Okudja opo okwa kufa mo ombele nokonima onda kua. Eshi nda kua ovakwashiwana ova lotoka nokuyambidida nge. Meme umwe ou a li popepi okwa kufa tete emanya ndele te li mu kupula. Okudja opo ovanhu vamwe va li popepi ova lotoka tave mu dengele monhapo fiyo tave mu kwata. Ongodi okwa hangwa e i kupulashi,” Hambiya ta hokolola. Eshi opolifi ya ka fika ponhele yoshiningwanima oya hanga nale omufekelwa a mangwa neembale, a dengwa kovakwashiwana.
Hambiya ta hokolola ta ti okwa li a tila onghee okwa hangika nale a yandja ongodi yaye komufekelwa molwaashi ina hala okutuwa nombele.
Okwa ti ponhele opo oha shakeneke po shito ovalumenhu hava kala tava nyeke ovanhu omaliko avo.
“Ovanafikola katu li meameno ngeenge hatu i ile hatu di keefikola shaashi ohatu kala twa telwa kookalyamupombo meendjila,” ta ti.
Okwa kumaida ovanafikola vakwao opo va kale va kotoka ngeenge tava di ile tava i keefikola molwaashi ookalyamupombo paife ova ninga vahapu.
Ovakwashiwana ova lombwela Kundana tava ti oimuna yavo oya ninga oihakanwa yokuvakwa po, nomaumbo avo taa teywa omanga ovanhu ohava nyekwa omaliko avo ngeenge tava di koilonga. Ovakwashiwana ova indila opo omufekelwa oo aha pewe obooloha molwaashi ngeenge okwa di mo modolongo natango ota ka twikile nokunyeka ovanhu omaliko avo.
Omukwashiwana umwe okwa ti ova langula omufekelwa opo a kale e lihonga oshihongwa kutya ovanhu ihaa nyekwa omaliko avo.
“Otwa loloka eembudi momudingonoko wetu. Ohatu longo oinima yetu noudjuu ashike paife ohatu i nyekwa kookalyamupombo inava hala okulonga voo vene,” ta ti.