ONGWEDIVA – Kansela woshikandjohoololo shaMulonga Erickson Ndawanifa okwa ti ovakwashiwana moshikandjohoololo shaye ohava ende oshinano shile tava ka konga omayakulo opolifi molwaashi mOmulonga kamu na oshitaashi shopolifi.
Onghee okwa yelifa ta ti onghalo yokuhe na oshitaashi shopolifi oi li eshongo linene moshikandjohoololo.
Meenghundafana davo naKundana Ndawanifa okwa ti okwa li okuninga eenghendabala dihapu ta pula epangelo opo li ete oshitaashi shopolifi moshikandjohoololo shaye ashike fiyo onena ina mona ekwafo lasha.
“Onda li okushangela omikanda kombelewa yakakukutu wopolifi noshoyo kombelewa yomukulunhu wopolifi mukulu pefimbo kwa li e li moilonga ashike kemanya ku dja ondwi,” kansela ta ti.
Ndawanifa ou e li yoo vali omunashipindi welelo loshitukulwa shopaukansela mOhangwena, okwa hokolola ta ti oshikandjohoololo shaye osho shimwe shi na omwaalu muhapu wovanhu ashike kamu na omayakulo e lixwa po, nonghalo ngaashi yeepate dii oyo tai pangele.
“Ovanhu paife ihava lopota vali oimbuluma pefimbo molwaashi oitaashi yopolifi oi li komakule. Ovanhu ohava futu eelefa ngeenge tava i koitaashi yopolifi,” Ndawanifa ta ti.
Okwa weda po ta ti ngeenge omunhu okwa dengele opolifi pe na oshiponga shonhumba, opolifi ohai nyamukula kutya kape na otuwa.
Okwa ti oshiwana paife osha hala okuliunganeke okuningna omunyanyo wopambili kombinga yomhumbwe yoitaashi yopolifi.
Lopokati opo, Ndawanifa okwa ti okwa udifwa nai kombelewa yaminista woikwameni neameno lokeengamba molwaashi minista a ninga omatokolo okutunga oshitaashi shopolifi kEpembe nOkomundaungilo.
“Ame inava kwatafana nombelewa yange onga ndi li omunashipundi moshitukulwa kutya otava ka tunga oitaashi yopolifi koikandjohoololo ivali. Okwa li ve na okukala va shivifila nge tete opo tu dule okuyandja omadina oikandjohoololo ei ihe na oitaashi yopolifi,” ta ti.
Okwa ti oshikandjohoololo shaShikunde nasho kasha na oshitaashi shopolifi ashike minista okwa yandja elombwelo opo oitaashi i kale ya tungwa koindjohoololo oku ku na nale oitaashi omanga pe na oikandjohoolo ihe na sha.
Eshi a kwatafana naKundana kakukutu wopolifi Inspector General Joseph Shikongo okwa ti ombelewa oya didilika oshikandjohoololo shaMulonga sha pumbwa oshitaashi shopolifi, onghee okwa ti okwe lipyakidila nokuninga omalongekido okutunga oshitaashi kOmulonga.
“Otwa faneka yoo vali okukala twa tunga oitaashi yopolifi koikandjohoololo ya yooloka,” Shikongo ta ti.