Ominista onkulu yoondjila nomauyelele Moses Amweelo okwa hulitha uusiku wOmaandaha moshipangelo shopaumwene shaLady Pohamba moWindhoek. 

Okwa li e na oomvula 73.

Omukwanezimo ngoka a koleke oshiningwanima shika okwa ti Amweelo okwa kala ta lwitha omukithi gokaankela ethimbo ele. 

Amweelo okwa yambukile momukunda Okatana moshitopowa shaShana.

Okwa kala oshilyo shongundu Swapo osho wo oshilyo shomomutumba gwopashigwana, omanga ina ninga minista gwoondjila nomauyelele.

Okwa li a tameke iilonga ye ongomulongisikola kosikola Iiwiyongo Combined, e ta kala ta longo pakathimbo ongomuhongi kiiputudhilo yopombanda Unam no-IUM. 

Amweelo okwa li natango ha shanga moshifokundaneki shoNew Era, kepandja lyomayele.

Ongula yEtiyali sho kwa li onkundana ya taambathanwa komalungula, oshigwana osha kala tashi gandja omahekelelo omolwezepo lye.

Yamwe oya tanga Amweelo ongomukwathi, osho wo kuume koyendji.

Omutekulu gwe Hilma Negumbo okwa dhimbulukwa hekulu ongomusamane gwomwenyo omwaanawa.

“Tatekulu okwa li omunyanyukwi nakuume kaayehe, nuuna tu li naye ohatu kala tu uvite ohole oshoka okwa li e tu hole,” ta popi ngaaka.

Ta ti, aluhe ye li piituthi oha kala te ya ndjokonene kombinga yezimo, ta hokolola kutya oya tseya oshindji oshoka okwa kala he ya hokolele onziililonkalamwenyo yezimo.

Negumbo okwa ti, oya kanitha namwenyo mwaanawa, omukwathi osho wo ongudhi yezimo.

“Omwenyo gwatatekulu  nagu vuvulukwe nombili,” ta popi ngaaka.

Amweelo okwa thigi ko omukulukadhi gwe, aanona yatatu naamwayina yaakiintu yaali.

-vkaapanda@nepc.com.na