Presidente Hifikepunye Pohamba karuganesere yisupa yovanakufa ava vazumbanesa nomwenyo dayo siruwo sokukondjera sirongo, mokudiworokesa vaNamibia asi kapi vagwana emanguruko eli noureu, honde kwatjika ntani vantu kwazumbanesa nomwenyo dayo.Apa katambwire yisupa yovanakufa vatano yovarwi vanare wombunga zaSWAPO, ntani nompitisili edi dakereko dafire siruwo sina, mosirongo saAngola, Presidente Pohamba katanterere vantu kava kerepo asi ekondjero emanguruka kwakere edigu ntani kwarepere. Mayovi govaNamibia vagara novakadi kwatulire eparu lyawo moudigu apa vatokwere asi vahepa kumangurura sirongo sawo, ano sinzi saw okapi vayasika oku tuna kara ngesi ndi asi vayamone asi sirongo sawo ngapi sina kumona emanguruko mo1990. “ Twahepa kuvafumadeka ntani ose nkenye apa ngatuvadiworoka morwa kutura eparu lyawo mokukondjera sirongo esi. “ yimo ana kutanta Presidente Pohamba. Awo kwatokwere kutura eparu lyawo momudona asi vahepa kufira sirongo sawo eyi yatwaredera dogoro vapire kuyamona asi ngapi tuna kutulika erembe lyosirongo esi. Awo kwagava honde zawo asi zahepa kumangurura sirongo esi, awo kwalikida asi vakondjeli emanguruko wouhunga, wokupira kutjira. Muhoko ngagu kara narunye guna hafa, morwa kweyi varugana ngomapenda gara nomapenda kadi. Presidente yipo nye katente asi epangero yipo lyatokora asi yisupa yovanakufa ava yahepa kuyireta mosirongo esi vakondjerere, ndi asi vavaretera, yisupa eyi kutamekera kovantu ava vadipaga kutunda mo 1904 dogoro mo 1908, siruwo oso vaNdovesi vadipagere vantu vetu momudona.
Vatano nye ava yikora yawo kavaretere sivike sinapuko kuna kara, Eneas Peter Nanyemba,silyo gakere gokomitiye zoPolitBuro ntani Central Committee, hamutjanga govakwaita wombunga zaSWAPO. Age kwadogorokere mo 1 April 1983, kehudi lyedona lyehauto moLubango, Angola.
Camarada Walde Homateni Kaluenya, silyo soPolitBuro noCentral Committee. Age kwafire mo 20 December 1980, moAngola.Camarada Isak “Pondo” Shikongo , gakere koruha rovakwaita ntani mukurona gonombudi daPLAN. Age kwafire mo 27 August 1982, moyita. Camarada Natalia Ndahambelela Shikangala Mavulu, silyo gakere soCentral Committee. Age kwafire mo 4July 1977, moAngola. Comarada Augustus “
McNamara” Nghaaamwa, gumwe govarwi vanare wombunga zaSWAPO, kwafire moyita mo 20 December 1982. “ Melikwamo nye eli ose kuna lituramo unene asi twahepa kureta yikora eyi kosirongo sawo oku vavahampurukira yimo ana kutanta Pohamba. Nampili ngomu asi awo kapi vaparuka vayamone erembe lyomunyengi omu lina kugururmuka, nokutara lyetu lyaNamibia omu vana kulitulika, awo kwarwa, nokufira sirongo esi ngomapenda. Presidente kwatente asi navenye ava ngavavavhumbika melikwamo lyepangero, epangero nare lyatameka kuzogera nova vakara asi ekoro lyovantu ava woyikora eyi yipo valigwasane asi kupi navavhumbika yiokora eyi.