Ehangano lyomakwatathano gopangodhi lyo-MTC opamwe nombelewa yOmupilima, oya uvaneke okuyambidhidha opologalama yaanasikola, noomilliona N$2 kehe komumvo.
Ehangano lyo-MTC olya ti, olya tokola ngaaka okuyambidhidha aanasikoloa niilonga yopokathimbo okumona ontseyo ya gwedhwa po mwaashoka taya ilongele.
MTC ota indile omahangano oshowo oongeshefa oonene opo ndhi yambindhindhe opologalama ndjoka noshimaliwa sha thika poN$200 000.
Omukuluntupitithi mehangano lyo-MTC Tim Ekandjo okwa ti opologalama ndjoka okwa li ya tulwa miilonga okuza momasiku 17 gaJuni 2019. “Opologalama ndjika oya nuninwa okuyambidhidha aanasikola ye li kiiputudhilo yopombanda, oku ya longekidhila ondjila oshowo okumona iilonga mbala uuna ya mana eyilongo lyawo,” ta fatulula ngaaka. Ta ti, MTC okwa yambidhidha aanasikola ye li 600 ya pitila moprogalama ndjika.
“Otwa tokola okuninga opologalama ndjika, yi kale tayi yambidhidha oshowo tayi yambidhidhwa oshilongo ashihe, ano yi kale yAanamiba ayehe moshilongo,” ta ti ngaaka.
Ta gwedha po kutya sigo oompaka aalongwa ye li 48 000 oya taalela uupyakadhi wokumona iilonga yopokathimbo okumona onsteyo ya gwedhwa po, okwiilongekidhila konima ya mana omayilongo gawo.
“Opologalama ndjika oyi na okutalika ko onga omukanda gokumona iilonga konima ya mana osikola, oshoka iilonga ohayi pula ontseyo moshilonga shontumba, opo gumwe a kutwe miilonga yontumba,” ta fatulula ngaaka.
Oyendji ohaya kala pevi konima ya mana oosikola kiiputudhilo yopombanda omolwomaunongo oshowo ontseyo ya gwedhwa po ndjoka haya kala kaaye na.
Ekandjo ta ti, ehangano lyawo olya totha mo omahangano omanene ge li 53, ngoka taga vulu okuyambidhidha opologalama ndjika noshimaliwa shi thike N$200 000.
“Natu yambidhidheni aalongwa okupitila mopoloyeka ndjika, okushunitha pevi omukundu gokwaa na iilonga, konima ya mana eyilongo lyawo. Shoka hashi etwa kuupyakadhi wokwaa na ontseyo ya gwedhwa po,” ta kumagidha ngaaka.
Ta gwedha po kutya uuna oshimaliwa shoka sha gwanithwa po komahangano ngoka otaya ka gongela oomilliona dha thika N$14 kehe omumvo.
“Oshimaliwa shoka otashi ka yambidhidha aalongwa okuza pomwaalu 160, okukwathela aalongwa ye li 16 000 momvula,” ta ti ngaaka.
– vkaapanda@nepc.com.ma