Ehanagano lyokukwatakanitha omawi pangodhi onkene tali tsikile okulongelwa omiyonena koshigwana, sho oosola dhawo tadhi teyagulwa nokuyakwa po.
Ehanagano lyo-MTC ndyoka olyo tali dhana onkandangala mokukwatakanitha omawi moshilongo, olya tseyitha euvonayi omolwomiyonena tali ningilwa koshigwana, nonando tali kambandhala okweeta omauwanawa popepi.
MTC okwa li a tseyitha ngaaka konima ya li ya lopotelwa kutya ehala lyawo lyimwe, lyomakwatathano olya hanagulwa po koKunene moshitopolwa shaMusati. Omukuluntuwiliki koshikondo shokwaandjaneka omauyelele John Ekongo okwa ti, ehala ndyoka lyi na oosola dha yonagulwa nokuyakwa po, olyi li kOmakange.
“Oosola ndhoka okwa li tadhi gandja omayakulo komahala Otjombura, Okozoserandu, Okaholo oshowo osikola Amaupa Primary,’’ ta popi ngaaka. Ekongo, okwa popi kutya okuyonagula oosola ndhoka otaku teyagula po wo omayakulo taga gandjwa moshigwana oshowo okushunitha ehumokomeho monima. Ta ti, omakwatathano goongondhi oga simana monkalamwenyo ya kehe gumwe, otashi kala uupyakadhi unene ngele kage po. “Ngele oosola ndhoka dhi na okulongithwa okweeta omakwatathano otadhi hanagulwa po, oshigwana otashi kala ngiini mekwatathano, otashi longo ngiini iilonga yawo?’’ ta pula ngaaka.
Ta nyenyeta ta ti, oshigwana otashi yaka po oosola, otashi teyagula nokuhalakanitha ashihe MTC a tula po, kaaku gandjwe omayakulo. Ta ti, iiningwanima mbyoka iiwinayi, notayi ya thiminike okulongulula omahala ngoka natango, oshowo okulanda oosola oompe, shoka tashi ya shunitha monima oku ka tula komahala hoka kaku na omakwatathano gopangodhi.
“Ngele pehala opwa kala kaape na omakwatathano gopangodhi, otashi kala oshidhigu opo aantu ya kwatathane niipangelo nenge naapolisi uuna pwa holoka sha,’’ ta popi ngaaka. Ta kumagidha oshigwana shaa teyagule po oosola ndhoka okugandja omayakulo ngoka gongushu. Ta gwedha po kutya kehe ngoka ta ka kwatwa ta longo iionga mbyoka, otaka taalela egeelo enene.
“Ehangano lya-MTC otali tsikile okugamena omahala ngoka opo omiyonena dholudhi ndoka kaadhi holoke,” ta popi ngaaka. Ekongo okwa indile omalelo gopamuthigululwakalo ga longele kumwe nehangano lyo-MTC okugamena omahala ngoka, opo kaaga ningilwe imiyonena koshigwana. -vkaapanda@nepc.com.na