Ehangano lyokukwatakanitha omakuthiikuthi gopangodhi (MTC) okupitila moprojeka yokuyambidhidha oosikola dhokuushayi, melongelo kumwe nuuministeli welongo olya yambidhidha osikola Onaushe netungo.
Osikola Onaushe oyi li moshitopolwa shaShana moshikandjohogololo Uuvudhiya noya tungilwa etungo lyomala gane oshowo okangulu kokupungulila kongushu yoshimaliwa shi vule N$800 000.
Omukuluntu gwelongo moshitopolwa shaShana Hileni Amukana okwa ti, eyambidhidho lya tya ngaaka, lyondjundo yi thike mpoka olyo lyotango tali holoka moshitopolwa she.
“Otandi pandula nomwenyo tagu hambelele oshoka aalongwa yetu oyo aanelago. Aalongwa ohaya ilongo ya mana mo uuna taya longelwa momahala taga hokitha noga yela,” ta popi ngaaka.
Ta ti, onga uuministeli otaya tsikile okukondjela oosikola ndhoka dhi li lela mompumbwe, opo dhi mone omayambidhidho omolwelongo ewanawa lyaanona.
“Elongo olya simana, olyi na okusimanekwa. Ngele okanona inaka mona elongo nena nonkalamwenyo yako ohayi kala ya mbwalangandja, mongashiingeyi ku na mpoka to yi kokule kuu na ooshapi dhelongo,”ta popi ngaaka.
Omukuluntu mendiki lyo-MTC Tim Ekandjo esiku ndyoka okwa li a fatulula kutya oya yambidhidha ngaaka okugwanitha po iinakugwanithwa yu uvanekele uuministeli welongo.
“Onga ehangano lyo-MTC, inatu hala okumona aalongwa taya longelwa mootenda, mehala itaali hokitha, ihe otwa hala aalongwa ye li moongulu oshowo momahala taga gandja wo natango omukumo kaalongwa ya ilonge ya mana mo,” ta popi ngaaka.
Ekandjo esiku ndyoka okwa li natango a kumagidha aalongwa posikola mpoka ya tsikile okwiilonga ya mana mo, opo natango nayo ya tsikile okuyambidhidha noompumbwe taya ka pula monakuyiwa.
Ngoloneya gwoshitopolwa shaShana Elia Irimari okwa ti, ohashi nkundipaleke omadhiladhilo gaalongi oshowo aalongwa uuna taya longele nenge taya longelwa momahala itaaga hokitha ngaashi kohi yomiti nenge mootenda.
“Elongo ohali kala lya pama aluhe ngele omulongi nomulongwa ye uvite nawa, oshowo ombili. Ngaashi naana MTC a yambidhidha nena nongulu yomala gane posikola mpaka, omolwa ohokwe nesimano MTC ena naalongwa,”ta fatulula ngaaka.
Irimari okwa li a pandula ehangano ndyoka, ta ti shoka lya longo osha simana ihe na li tsikile oku shi ningila oosikola dhilwe moshilongo dhi li mompumbwe.
MTC, okupitula moproyeka ndjoka okwa yambindhindha oosikola miitopolwa ngaashi Kunene !Karas, Otjozondjupa, Kavango west oshowo Oshana kongushu yoomiliona N$6.4