EPEMBE – Ehangano lyomakwatathano gopangodhi lyo-MTC pamwe nehangano lyo-MVA Fund okupitila moproyeka yokuyambidhindha oosikola dhokuushayi, oga yambindhndha osikola Ondulundiya netungo lyongushu yoshimaliwa shoN$1 000 000.
Osikola Ondulundiya oyi li moshitopolwa shaHangwena moshikandjohogololo Epembe noya tungilwa etungo lyomala gatano oshowo okangulu kokupungulila kongushu yomilliona N$1 omanga MVA Fund a yambidhidha N$200 000.
Omupeviminista gwelongo Faustina Caley okwa ti, eyambidhidho lya tya ngaaka, lyondjundo yi thike mpoka olyo lyotango tali holoka momundhingoloko moka.
“Elongo olya simana, olyi na okusimanekwa. Ngele okanona inaka mona elongo nena nonkalamwenyo yako ohayi kala ya mbwalangandja, mongashiingeyi ku na mpoka to yi kokule kuu na iipatululo yelongo,”ta popi ngaaka.
Ta ti, onga uuministeli otawu tsikile okukondjela oosikola ndhoka dhi li lela mompumbwe, opo dhi mone omayambidhidho omolwelongo ewanawa lyaanona.
Omulongisikola posikola Ondulundiya Combined Justine Shinana okwa ti, oya kala nokulongela aalongwa yawo momahala ga dhikwa niiti, ehala itaali hokitha nando, ehe nena oya mono oongulu oompe.
“Otandi pandula nomwenyo tagu hambelele oshoka aalongwa posikola mpaka oyo aanelago. Aalongwa ohaya ilongo ya mana mo uuna taya longelwa momahala taga hokitha noga yela,” ta popi ngaaka.
Omukuluntu mendiki lyo-MTC Tim Ekandjo esiku ndyoka okwa li a fatulula kutya oya yambidhidha ngaaka okugwanitha po iinakugwanithwa yu uvanekele uuministeli welongo.
“Ongehangano lyo-MTC, inatu hala okumona aalongwa taya longelwa mootenda, mehala itaali hokitha, ihe otwa hala aalongwa ye li moongulu oshowo momahala taga gandja wo natango omukumo kaalongwa ya ilonge ya mana mo,” ta popi ngaaka.
Ekandjo esiku ndyoka okwa li natango a kumagidha aalongwa posikola mpoka ya tsikile okwiilonga ya mana mo, opo natango nayo ya tsikile okuyambidhidha noompumbwe taya ka pula monakuyiwa.
Omukuluntu gwelongo moshitopolwa shaHangwena Isak Hamatwi okwa ti, ohashi nkundipaleke omadhiladhilo gaalongi oshowo aalongwa uuna taya longele nenge taya longelwa momahala itaaga hokitha ngaashi kohi yomiti nenge mootenda.
“Elongo ohali kala lya pama aluhe ngele omulongi nomulongwa ye uvite nawa, oshowo ombili. Ngaashi naana MTC a yambidhidha nena nongulu yomala gatano posikola mpaka, omolwohokwe nesimano MTC e na naalongwa,”ta fatulula ngaaka.
Hamatwi okwa li a pandula ehangano ndyoka, ta ti shoka lya longo osha simana ihe nali tsikile oku shi ningila oosikola dhilwe moshilongo dhi li mompumbwe.
MTC, okupitila moproyeka ndjoka okwa yambidhidha oosikola dhi thike 41 miitopolwa ngaashi Kunene, //Karas, Otjozondjupa, Kavango West, Hardap, Ohangwena oshowo Oshana.
vkaapanda@nepc.com.na