MTC okwa pititha omushangwa ta londodha oshigwana kutya ita gandja oshimaliwa ngaashi tashi taambathanwa komalungula, anuwa okuhekeleka oshigwana omolwoosa dhOmukokolipresidente Sam Nujoma.
Oya shanga kutya ope na mboka taya longitha omukalo gokutota ombaanga yawo yedhina MTC Maris, opo ya mone uuyelele waantu ya vule oku ya yuga oshimaliwa koombanga dhawo.
“Ino ninga oshihakanwa, kotoka, MTC ita gandja nando oshimaliwa,” ya shanga ngaaka.
Omupitithi gwomauyelele omukuluntu mehangano lyo-MTC John Ekongo okwa ti yo otaya gandja ashike oodata nominute okudhenga koongodhi, ihe itaya gandja oshimaliwa nando. Ta ti, oongangala otadhi longitha omukalo gwo-MTC Maris, ombaanga ndjoka hayi pungulwa oshimaliwa shakehe ngoka a hala osho wo okufuta omayakulo ge. “Oongangala otadhi lombwele oshigwana shi longithe omukalo ngoka, yo taya thindi ponomola ne, mpoka pwa shangwa oshimaliwa shoshali. Shoka kashi na sha noshimaiwa tashi gandjwa ku-MTC,” ta fatulula ngaaka.
Ekongo okwa fatulula kutya MTC ke na esiku a gandje oshimaliwa, iha longo niimaliwa.
Ta gwedha po kutya oshimaliwa shoka kwa li sha gandjwa N$750, peyhimbo lyoCovid, kashi li sha zi ko-MTC ihe osha li sha zi kuuministeli wemona.
“Otandi kumagidha oshigwana shi kale uupathi uuna sha dhengelwa kaanambelewa yiifundja, shaa gandje nande uuthemba wawo oshoka MTC ita gandja oshimaliwa,” ta kumagidha ngaaka.
Yamwe mboka ya li moonkudathana noshifokundaneki shika oya ti, oyu uvu kutya MTC ota gandja N$950 kukehe gumwe, ngele a dhenge onomola *140*682#.
“Otu shi oshili oshoka oshigwana ohashi vulu okupewa oshimaliwa omolwomatompelo ga yooloka. Okwa li tu wete tatu hupu ko, oshimaliwa otwe shi hala shili,” ya yamukula ngaaka konima ya fatulilwa kutya ndhoka odhaNakalindi.
-vkaapanda@nepc.com.na