KATIMA MULILO – Mubalehi wa sikebenga Mutolwa Masule, ya zibahala kalibizo la Nine, utimezi. 

Masule ubihiwa kuli nakunupilwe ki mapokola banaha Zambia busihu bwa Labulalu hana lika kubanda mwa mazoho amapokola. Masule neli mubalehi kufitelela likweli zetalu, kasamulaho yena ni babañwi balishumi ka alimuñwi neba tobile mwa tolongo ya Katima Mulilo mwa kweli ya Lungu. Piho yene patalalizwe famakepe asicaba ibulela kuli Masule nasweli kukataza mwa tolopo ya Mongu mwanaha Zambia mwa likweli zefelile. 

Hala zeñwi ubihiwa kuli nanatile niku uzweza mubeleki yanwisa mafula K1 600 (N$1 127), ni cansi yamasheleñi alikana K500 (N$352). Labubeli litohonolo la hae la mutobela mapokola ha ba muswala ni kufumanela tobolo ya AK-47 ni malumo alishumi, ni cansi yana uzwize. Kuswaliwa kwahae nekutile kasamulaho mapokola balumiwa zebe zamuuna ya itumbaeta ni kuiponisa ni tobolo ya AK-47 mwalinwelo la bucwala la 29 Sikulu, neli kalibaka leo mapokola ba swala Masule.

 Ubihiwa kuli naitumelezi kuli naezize likezo zebalwa, kungelela cwalo busholi kwa siteshini sa kunwisa mafula sa Puma, kutuba sintolo sa Pep mwa Senanga mwana uzwize mafoni. Labulalu hana longilwe ki mapokola kanako ya 23:00, kuzwa kwa Senanga akupa kuli ubata kufapuha, mi alika kuli amate kukena mushitu, Mapokola ba bihiwa kuli neba kunupile malumo amamela, kono azwelapili kumata, neli teñi bamukunupa ni kumubulaya.

Muongaongi walitaba za bubangoki mwa sikiliti sa Zambezi Kenneth Simbwaye nanyatezi kuli naziba piho yenze ifulana, kono naize basa libelezi piho ya simubuso kuzwelela kwa mapokola banaha Zambia. “Lusa libelezi piho ya simubuso kuzwelela kwa Lusaka, ili kuli ba lubasi ili luna, luye luyo nitifaza kuli ki yena kapa awa,”nekubulezi Simbwaye.