WINDOKO – Mubatisisi wa katengo kaka lwanisa litaba za bulyangelino ili kaka zibahala ka ACC Phelem Masule, waitwanela kasamulaho akulundulwa fasitulo sakuba yomuhulu walitaba zakuzekisa ni kubatisisa kwa katengo kaka lwanisa litaba za bulyangelino. Masule nazusizwe fasitulo mazazinyana amano zibahazwa mwamusebezi omunca. Nahulisizwe kasamulaho akelezo kuzwelela kwa katengo kaka bona za misebezi ya sicaba kasamulaho akuba muipapati wabane babata musebezi.
Kono nakonyana amano kena fasitulo Ngambela Saara Kuugongelwa-Amadhila amuzwisa kamabaka akuli nekubile ni mafosisa. Ofesi ya Ngambela ibulela kuli katengo kaka bona za misebezi ya sicaba neka lumezi kuli kalulo ya kukenya musebezi nesika zamaya hande, nikuli muipapati yana ezize hande nasika lumelelwa kufiwa situlo kakuli nasika tambeka mapampili kaufela ane atokwahala. Masule ubihiwa kuli nabile wabubeli mi nafilwe situlo bakeñisa nako yasa sebelize. Kuugongelwa_Amadhila kiha laela kuli kalulo ya kukenya musebezi ikale sinca.
Masule kanako ya cwale ukwaluzi muzeko kwa Khuta Yepahami kuli ifetule buiketelo bwa Kuugongelwa-Amadhila. Natahisize kupo ya mapampili amabeli. Sapili ubata kuli khuta ife taelo ya putako ya kutibela ngambela kuli ataleleze muhupulo wahae wakubeela kuhuliswa kwahae famusebezi kwatuko, ukupa Khuta Yepahami kuli ife taelo ya kumukutiseza fasitulo sakuetelela litaba zakuzekisa ni kubatisisa kwa katengo ka ACC, kufitela katulo ifiwa mwamuzeko wahae. Mwa manzwi ahae Masule usebelisa mulao wabu 18 wamutomopuso wanaha ili olaela ngambela kutokwa sobozi hasebelisa maata ahae afilwe.
Uzwelapili kutalusa kuli ngambela nazwile mwanzila hane amutokwisize huliso yahae, sina mulao ozamaisa katengo kaka bona zamisebezi ya sicaba ha umulumelela feela kutaleleza buiketelo bwa katengo, kwanda Mueteleli wanaha kona yakona kunga buiketelo boo. Uzwelapili kutalusa kuli mulao wabu 18 umufa tukelo yakufiwa kolo yesina sobozi, ni kufiwa mapampili atisize kuli ngambela ange buiketelo boo.
Masule hape una ni maikuto akuli una ni tukelo yakuli haiba ngambela una ni buiketelo bo bushelana, mwa kutaleleza buiketelo bwa hae hana kubonisa sobozi mi uka eza kaswanelo asa lobi mulao wamutomopuso wanaha.
Ubulela hape kuli kuna ni tokwahalo yaputako ya kubukeleza liswanelo zahae zabuntu, kuli angiwe kuba famayemo alikanelezi fapila mulao. “Kuzwa nako yeo aeza buiketelo, nizwelapili kutimiwa huliso yaka, nizwelapili kunyandiswa ki buitelo bwa hae bwa kusinyasinya litukelo zaka,” nabulezi. Nihane anungahanyize Mueteleli wanaha, Yomuhulu wa ACC, katengo kaka bona za misebezi, Masule naize muzeko wahae undongwami feela ngambela kakuli kiyena wakumutima huliso yahae. Kanako yacwale hakuna ya bonisize kulwanisa kupo ya Masule, ili ya yemelwa ki Shakwa
Nyambe.