Katima Mulilo
Mubu o fita fa lihekele za bolule ba mshumi a mabeli u filwe kusebeliswa kwa mulelo wa njimo ya zetala mwa sikiliti sa Zambezi. Ndandanda ya mubu o nunile wa njimo u fumanwi mwa libaka za sizo zeshutana-shutana ze cwale ka Muyako, Kongola, Singalamwe, Liselo ni Muzungu.
Ze nelipatuluzwi ki mueteleli was sikiliti Lawrence Sampofu mwa nako yahae ya kupatalaza misebezi ya zwelopili mwa sikiliti biki yefelile. “Ofisi ya mueteleli wa sikiliti i konile kukupa kupa mubu o takona kusebeliswa kwa njimo ya zetala.
Mwanako ya cwale luna nimubu wa lihekele ze 20 000 kuza njimo ya bulimi. Kwa Muyako kuna ni lihekele ze 1000, Kongola ki 1 000, Singalamwe ki 5 000, Muzungu ki 2 000 ni Liselo ya 1 2000”, kwa talusa Sampofu. Mwahali amubu kaufela ki lihekele ze 10 000 fela zefilwe kuba lipulukelo za njimo ya lushaba lwa kwai, kuba Oriental Tobacco CC kwa Liselo, kwande a Katima Mulilo. Nihaike kuli mulelo neunyazizwe ki babaňata, kono kubulelwa kuli litukiso kikale lizwela-pili ahulu.
Sampofu u ize, sikiliti sitalimezi mikwa yeo sitakona kubiza ba lipulukelo kaona kukona kuto mbweshafaza sifumu.
“Ofisi yaka italika kubizeza balipulukelo mwa sikiliti, baba talika kubeya lipulukelo mwa njimo kunanula mayemo a lico, mayemo a sifumu, ni kutisa misebezi mwa sikiliti ni naha kabupala,”kwa talusa Sampofu. Lipulukelo zemwi zehatezi ahulu kwa pata mwa sikiliti ki ze cwale ka simu ya rice ya Kalimbeza upa wa sikiliti sa Zambezi, fa munanga wa Liambai.
Sibaka senesitumusizwe kuba simu ya naha ki mueteleli sapili Hifikepunye Pohamba mwa 2009, sibaka sa butuna bwa lihekele ze 50 kisesilimiwa mwahali a lihekele ze likana 2000 kakukopanyeleza. Rice ya mifutafuta ye bakanyizwe niyona ya bapazwa kwa Kalimbeza, nihaike kuli haisikaba kale fa misika ya lifasi.
Musebezi wa kuyaha miluti ya kubeya lilimiso hamoho cwalo ni minuno ya mwa masimu ipatehilwe kueziwa fa mashelenyi a fita fa N$15 million, kakuya ka lipiho zene yalilwe ki Sampofu mwa kutazo yahae.
Musebezi wa kulafa mezi a kenisizwe kamulelo wa kufa bayahi ba sikilti u sweli kuezahala, sina hanesekufelile likalulo ze peli. Kalulo ya bulalu yesweli kuezahala ingelela kuyepa liliba, ni kuyala mipila ya mezi kuzwa Bukalo kuliba Ngoma ni kuzwa Kongola kuliba Kapani.
Note. Monday, October 19 2015/ New Era for a picture @ 3. Zwelopili kwa hae Simu ya Kalimbeza i tisize misebezi ye mianda-nda mwa sikiliti sa Zambezi.
Sina Namibia haitalimani ni mulelo wa kuba sizuma sa lico, kukona kuipumanela, simu ye, ikona kuba yemwi ya likalabo nako ilimiwa yote. Kacwale, kulimiwa fela lihekele ze 48, mwa simu ya butuna bwa lihekele ze 200 ze itobalezi fela.