Muatuli mwa Khuta Yepahami Christi Liebenberg nalengile muuna walilimo zemashumi amalalu kazepeli Inock Mazila Nalisa, lilimo zemashumi amalalu kazetalu mwatolongo kamulatu wakubulaya mufumahali wahae walilimo zemashumi amalalu, Petra Njakwabo Munikonzo.
Nalisa nafumanwi mafosisa famulatu ulimuñwi wabubulai, obaleha ni mulao wakulwanisa bubangoki mwa mabasi, ni mafosisa famulatu ulimuñwi wakubata kupata bupaki. Bazekisi bamubuso nebaize kasamulaho akutaba musala ‘hae, napatile silemano sana belekisize.
Bazekisi hape neba akaleza kuli namubulaile kakumutaba famubuli ni kumunata ni sando kwa likoshi kasamulaho akukanana. Nafumanwi ni matuuma amashumi amabeli famubili, ni alishumi ka aketalizoho kwa toho. Nashwile onafo. Muatuli Liebenberg naize manzwi acwale ka , “situhu, moya omasweni lunya” ataha mwa munahano mutu habata kutoloka mukwa wana bulailwe kaona nyandi. Naize batu bana ni kubala mitende kubona sililo sa sicaba hala bubangoki bobucwalo ni hakuna ni limamela kuzwelela kwa likhuta.
“Kibumai kuli likelezo zeo liwela mwamazebe atibani, mi likezo zemaswe zeo lizwelapili,” nekubulezi Liebenberg. Nabulezi hape kuli taba yakuli Nalisa na ombile moyo mutu yana iketezi kupila niyena, mutu walilimo zemashumi amalalu ni mahe musizana walilimo zelishumi yabilaeza.
Nitaba yakuli musizana yo nakenezwi kisabo yakubona mahe inge abulaiwa. Nihaike khuta haiswaneli kulatehelwa kipono yalitokwahalo zasifosi, khuta ifilwe musebezi wakubukeleza bayahi banaha babalatelela mulao kwalibangoki.
“Kacwalo, libangoki zeo lina ni kuzwisiwa mwahala sicaba kanako yelukela,” nekubulezi muatuli Liebenberg.
Kacwalo muatuli alenga Nalisa lilimo zemashumi amalalu kazetalu zabubulai ni zepeli zakupata bupaki mi alaela kuli limate kanako yeswana.