ONGWEDIVA – Mubuleli wakeleke ya Pentekositi kwamunzi wa Onheilwa, Shalongo Haimbodi ukulubelwa kuli usweli kufumbela kukunupa baba munyaza. Shaanika Nashilongo yaokamezi katengo kakabona zakulwanela liswanelo zabatu ili kakazibahala kalibizo la Monica Gender Equality Human Rights and Social Justice, naize ufumbelwa kubulaiwa ki Haimbodi kasamulaho akumunyaza kuli uputelela bayahi bamunzi. Naize liviki zepeli zefelile napotezwi kibasali bababeli bane babilaela kuli baputelezwi ki Haimbodi, yana babulelezi kuli mwalubasi lwabona basweli kuloyana.
Naize basali bababeli ili babapepwa hamoho nebanze baitwanisa kasamulaho yomuñiwi nabulelezwi kuli uloya wahabo. “Seniya ku Haimbodi kuyo mulemusa zataba yeo kono uzwelapili kubeya maswaniso famakepe amusali yabulela kakusebelisa mubili wakezalahae. Maswaniso awo nailo kopelwa kwa keleke yahae,” natolokile. Nashilongo naize hasa ikutwa kuba mwabuiketo hazamayazamaya. Viki yefelile basali bababeli neba ilo ngongota Haimbodi kwa khuta kasamulaho akubea maswaniso akubasinya libizo falikepe lahae la Facebook lelina niba lateleli ba 4 997.
Neba ilo fiwa N$15 000 muñwi ni muñwi kimuatuli waKhuta Yepahami Marlene Tommasi. Zeo halili cwalo maswaniso abonwi falikepe la Facebook, Haimbodi naize una ni litobolo zena ni mañolo mi nalutilwe kukunupa batu. “Nina ni litobolo zeñata. Hani lipyeha. Nikabulaya Nashilongo ni bayemeli bahae kakuli basweli kusinya keleke yaka libizo. Keleke yaka haikauhanyi mabasi mwa minzi,” Haimbodi nabulezi mwamaswaniso ane abeilwe falikepe lahae la Facebook.
Kono Haimbodi nalatuzi kuli nafumbela Nashilongo. “Maswaniso nacincizwe, kono kina yana bulela. Ni mubuleli, muuna wa Mulimu, hanikoni kubulaya batu,” nabulezi mi nahatelezi kuli nabulezi feela kuli haiba inge atamiwa, uka bulaya mutu ni bayemeli bababeli, mi nasika biza libizo la Nashilongo. Naekelize kuli uswabiswa kitaba yakuli Nashilongo ubata kukwala keleke yahae.