Rudolf Gaiseb

Mubuso ubulela kuli kuswanelwa kuzwelapili kunyatisisa kwa nuka ya Chobe, kubona kana kuna ni seo sikonwa kuezwa kutibela kutiba kwa lifolofolo. Likolo la silalanda, mishitu ni bupoti neli ize lipiho zetalu neli bihilwe mwalilimo liketalizoho, mi ya cwalecwale ne bihilwe liviki zepeli zefelile.

“Haki mulelo wa mubuso kucinca mayemo anuka mwa inezi, kakuli ku eza cwalo kukaswana kutisa kozi yetuna kwa silalanda,” likwambuyu wa likolo Indileni Daniels nabulezi mwandu ya mulao Labune.

Bayahi basilalanda neba ikozi malyalya alinali zemashumi alobanwi, zene tibile limano limbana kwa Kabulabua, upa wa sikiliti sa Zambezi mwa mabala amuunda. Likolo neli lumelezi kuli nama ifiwe kwa sicaba ka ofesi yebona za kusileleza lifolofolo mwa silalanda.

Sikwata sa linali, zene saba litau mwa sibaka sa pabalelo ya lifolofolo sa Chobe mwanaha Botswana, nesibata kutula nuka ya Chobe kutaha buse bwa naha Namibia Labubeli la 23 Muimunene. Kono kabumai selito fita kone kuna ni mañope, mi zatowa nikukala kuihatikela kufitela halikala kutiba.

Daniels nakile afa mamela kwa sicaba kuli nama ya nali yene filwe isike ya lekiswa kono ibe feela ya kuca. “Kuzamaisa nama kusina mañolo nekulumelezwi feela la 23 Muimunene 2025,” nabulezi, mi naekelize kuli sicaba baswanela kukuteka milao ye amana ni kulonga ni kulekisa nama ya lifolofolo zanaheñi. 

Kanako yacwale palo ya linali mutuloupa wanaha Namibia inuhiwa kuba 11 900. Kungelela cwalo ni libaka zeñwi zebukeleza lifolofolo upa wa sikiliti sa Zambezi, hamoho cwalo ni Bwabwata, Mudumu ni Nkasa Rupara.