WINDHOEK – Mueteleli wa sikiliti sa Zambezi Lawrence Sampofu u bulela kuli lipatisiso ze ezizwe kiba katengo ka Swapo ka sikiliti, kao nekafumani litaba za bulyangalino, busilibonda ni mafosisa amamwi kuba katengo ka tolopo ya Katima Mulilo ki zaniti.
Sampofu hape u talusa kuli hana mata akukungulela kwa tuko ma councilor ba balalu ba SWAPO kwa litaba za mafosisa zeo ba akalezwa kuitenga kuzona, mi uli ki ba kopano yebusa fela babana ni maata akueza cwalo. “Lipatisiso ki zaniti,” kwa talusa Sampofu. “Ma Councilor bao basabi babe fani, bainzi mwa libizo la SWAPO. Haiba mutai wa sikiliti wa kamaiso ya SWAPO inge babona mafosisa kwa ma councillor, bana ni maata akubuza.”. “Bakamaiso ya sikiliti ya SWAPO pili neba buzize kwa Ofisi ye tuna ya SWAPO pili basika zwelapili ni lipatisiso za kweli mukatengo,” mueteleli a talusa.
Lipatisiso ki SWAPO lifumani kuli ma councillor babalalu bao baiputezi mwa litaba za bulyangalino, kamaiso-maswe, sebeliso-maswe ya mashelenyi, kukenya bahabo bona misebezi, ku leka kweta kakufa lisebelezo za misebezi kwa masika ni balikani babona kusina kulatelela milao ye tomilwe. Ma Councilor bao babalalu ki Mayor wa tolopo Charles Matengu, Muinasipula wa katengo kakamaiso Salubila Maswahu ni muinasipula yo munyinyani wa katengo kakamaiso, Nsala Muhongo. Katengo ka kalwanisa litaba za bulyangalino (Anti-Corruption Commission) katalusize kuli lipatisiso za kona akuna mafosisa akafumani mwa taba yeswana. Nihakulicwalo, mungendenge wa lipatisiso ki ba Kamaiso ya sikiliti ya SWAPO wa kweli mukatengo u hatisize kuli ma councillor babalalu ba baitengile mwa litaba za mafosisa.
“Ze bihilwe kwa piho ye ki nzwisa feela ya buima bwa buniti bwa litaba za Tolopo ya Katima Mulilo kuamana ni kamaiso-maswe, ni kusasebelisa hande mashelenyi,” ki seo sitaluswa mwa piho ya taba. Katengo ka lipatisiso kakupa Muzamaisi wa Sikiliti wa Kopano ya SWAPO, Linus Mafale, kulilimanisa ma councilor bao fa misebezi ya bona. Katengo ka Lipatisiso hape kakupa Likwambuyu wa Likolo la Milonganyana, Mandu ni Zwelopili ya Libaka za Matakanyani, Major General (Rtd) Charles Namolo kukona kufa pumulo ya mazazi amatelele ku Muzamaisi wa Tolopo Charles Nawa kufa sibaka kubalipatisiso za libuka kwa katengo ka tolopo. Mwa libuka za lipiho zebonwi ki ba New Era, Katengo ka Lipatisiso kafumani kuli mabulatu a mafosisa ana ni buniti. “Mulikani Charles Matengu una nimuhabo yena wa libizo la Simata Mutau Simasiku ya kenyizwe musebezi wa kubala lipimo za mezi fa tumelelano ya lilimo zepeli fa tifo ya mashenyi ka kweli a fa likiti ze ne ni mianda ye mine ya madola (N$ 4 400),” piho ibaleha cwalo ka likalulo. “Mulikani Nsala Muhongo, mwana hae wa mushimani wa libizo la Simata Mutwa u kenyizwe musebezi wa kuamuhela mashelenyi (Cashier) fatumelelano ya likweli zetalu, fa tifo ya kweli ya mali alikana fa likiti zene ni mianda ye mine ya madola (N$ 4 400) ni mulikani Salubila Maswahu yena munyana hae wa libizo la Masule Linus u kenyizwe musebezi wa kuinelela wa butibeli bwa mulilo (Firefighter).” Piho izwelapili kubuza haiba nekulatezwi mikwa ye itusiswa ya tolopo kwa kufa lisebelezo za misebezi (tenders). Lipatisiso lifumani kuli lisebelezo za kufa misebezi (tenders) neli filwe kusina kulatelela mikwa ni milao ye swanela ya katengo, kakufa balikani ni lindambo.
Lisebelezo za misebezi zeo liakalezwa kuli nelifilwe kasilibonda, ki lisebelezo za kuyaha mikwakwa, kubeya libatiso mwa maofisi a tolopo, kuliulula ndu ya malobalo ya bakatengo ka tolopo, ni ndu ya mikopano ya sichaba ya Ngweze, ku ekeza malekisezo kwa musika wa Katima Mulilo ni kulemaka machachani. Libaka ze ketalizoho ni zetalu (8) za mayahelo liakalezwa kuli nelifilwe isikaswanelo kwa ma councillor, yo muhulu wa tolopo, balikani ni balusika fahalimu a nyandiso ya sichaba. Libaka za mayahelo zeo ki zeswana sina zalipisinisi ni maino, nelifilwe kusina mapepa alikupo za ona. Sibaka sesimwi sa mayahelo a pisinisi sesitisa singanyinganyi ki sa lihekele zeketalizoho sa mubu kwa mukulela wa nuka ya Lyambai kwa mukulela wa mukwakwa wa Ngoma wo Nawa naipile wona yena muňi afeza kuiamuha mutalahali councillor wa Swapo wa silalanda sa Sibbinda, Felix Mukupi.