Mukaro moAroab tagulitjindji,omu yakara vagara yiwo ava kwatere vakadi kononkondo ano ngesi vakadi yiwo vana kukwatera vagara kononkondo vakare kumwe nawo panyama.
Dogoro papa tuna kuuyunga ngesi vagara vatano nare vavakwatera kononkondo kwedi oku kakupwire.Moyimpagwa yine vakadi kwavagwana vanananameho, guna vapwaga morwa vagara ava vana kavarapota kovaporosi.
Awo kava tente asi simpagwa simwe kuna kusikona-kona vaporosi,yimo kavakatanterere yilyo yombongarero zanavenye ava kava kadingwira mukunda gwina. Nayinye eyi kayi kahorokere posigongi oso kava katulisire wombongarero zanavenye,zountu meparu,nonkarapamwe vakagwane asi ngapi ava paruka momukunda gwina gwaKaras.Komitiye ezi kazikere megendeso lya kamarada Hansiana Christina kava kavapere mbudi ezi, zina lisigi nomu azi horoka.
Mukurona govaporosi momukunda gwina Godfried Kauhanda yige katente mbudi ezi.Mokukwama vaporosi nayinye oyo kwahoroka posiruwo awo vantu ava vana korwa. Nayinye eyi kuna kuhoroka morwa kwato evango eli navatulira maudano.
Nye, ekwatero kononkondo lina zeruka momukunda ogu.Vaporosi kuna kutanta asi koyili yihorokwa yimwe eyi yina kara asi kapi vayirapota.
Eyi kwahoroka yiruwo yoyinzi mokukwama mukurona govaporosi momukunda gwina.Sinzi sava yahorokere kwatokora kutwara udigu ou vakaupangure pampo, omu vakadi ava kavafutisa vafutire vagara ava vakwaterere kononkondo ndi asi vakare nawo komusininiko,awo kwavafuta nongombe.Ano pwarumwe vagara ava kuvafuta yimaliwa.
Ose kuyizuvha asi muntu vanamukwatere kononkondo nye kutudigopera nsene asi mwene ogo vana kwata kapi ana yarapota kwetu ose vaporosi.
Ntani hena kapi tatu vasininike asi rapoteni yimo ana kufaturura ngoso muporosi.Age katente asi vakadi nawo kuna kuninkiliramo vagara, morwa woma nonomuga ntani hena vamwe kugazara asi uministeli ou wakarerapo marudi vharwa asi nampo kwakarerapo tupu vakadi.
Vakadi momukunda gwina kunwa nawo ngwendi vagara ntani hena awo kuparuka ngwendi vagara eyi yina kuninkisa asi vagara vana korwa nawo makura mukadi ogo age tawizanye aya rare nomugara ogo.
Vagara kuna kuvatwa nombere vakadi momukunda ogu, unene konombaha.Age kayinkondopekere asi vantu momukunda gwina kuna kunwa unene eyi yina kutwaredera dogoro vagwane mukisi ogu goHIV/AIDS.
Elirandeso marutu gawo naso simwe sina kara momukunda gwina, eyi kava yitumbwire mosigongi esi kava kere naso.Vakadona wovanonagona kuna kusintisa marutu gawo kovasingi womaroli vavape marovhu. Morwa udigu nye wangesi vantu owo kava kerepo kavahundilire epangero lisesupike nombaha momukunda gwina.
Vantu kuna kukara siruwo sosire konombaha,siruwo oso awo ngano kuna kurugananye vakulike kadoropagona kawo.Yimo ana kutanta kansela gomukunda gwina Magrida Bushy. Vantu womomukunda ogu kuruganesa unene yimaliwa yawo komarovhu yoyisesu tupu ayizi konondja.
Vantu ava tavavere, kapi ava zi nampili kongereka awo kunwa dogoro lyolyo lina kusa yimo ana kutanta Kansela. Nampili ngomu aku kara mufu vantu ava kuvagwana ponze zonombaha kuna kunwa masiku nagenye ano vamwe vanasigi vana vawo komambo nondja kwato.
Vamwe vazumbanesa yirugana yawo morwa marovhu.Kuvhura ogwane vanona vanakulira kwato eyi navalya,nombaha kwapaturuka tupu siruwo nasinye, vakurona vawo nakumwesi novayukira vanona kwanyata ngwendi valye yimo ana kuuyunga gumwe gatunga momukunda gwina.
Muntu gonomvhura nomurongo hamboumwe nomuyu ngesi kevango lyokukamudeura ana kara vamupopera asi ngano ngapi naparuka.
Ngesi kuna kuhundira vakwawo ngano vahakwama nzira ozo. “Ame nina diva nawa-nawa asi kapisi ureru kuhageka yikorwesa nepuyinakukwara.”
“Ame yimo napita ngesi kuna kukondja nihageke.”Ame kwayimona asi marovhu kuvhura gakuninke onyenge nampili vekoro lyoge vaava, kuvhura gakupangere orugane eyi opilire kugazara dogoro tokakara muntu opilire kugazara nawa.yimo ana kuhulisa ngoso.