Mukeke ogu kava hampurukire sinkwa ntani karetere sivaruro sovanona vana kuzuguma, awo vakeke sizeruke,morwa mazimo aga vana kugwana awo vahana kuliwapayikira.Mukeke ogu kakere mazuva gavali tupu kontunda zevhu kava muzugumine kevango eli vana kutumbura asi “Moria Grace Children” lyakara moKatutura eyi nayinye kayihorokere moune wapita. Ogu ana kwaterere mukeke momawoko gendi mukurona gevango olyo ali pakere vanona sinka Wilhelmine Afrikaaner,age katente asi ozina womukeke ava vana kara asi wonomvhura 20,kavakambadarere asi ngano vadapge mukeke ogu apa kaya dimbwilire asi mugara ogu gamupa muna nani gakwara ndi ogu varere nendi esiku limwe gakwara.Age katantererenge asi tani mudipaga mukeke ogu nsene asi takara name,yimo ana kuyifaturura Afrikaaner nonkenda kwaNew Era.Age simpe kagwedereko asi mukadona ogu ngahoreke ezimo lyendi asi vantu peke vahayimona asi age nezimo omu ngadwara mamukoverero gomamure.Yipo asi nagumwesi gadivire asi mukadona ogu nezimo ndi asi nomarutu gavali.Edina lyozinya mukeke simpe kapi lina divikwa.Age kuna kumu tanta asi ntundiliro zendi koKalkrand momukunda horowero gwaHardap. Apa gayidimbwilire asi nezimo kwakambadarere kunwa nomutji asi ngano ezimo olyo litundepo nye kapi yakwefe.Age kahampurukire gahana kumona nampili idigu wongandi nahena mukeke ogo muwaawa mosipangerogona saKatutura moVenduka.Afrikaaaner katente asi nampili ngomu asi mukeke ogo muwaawa,mutji ogu vanwine ozina gwaretera mukeke ogu akare nomavavi noyininke yimwe yina kumuzuga omu ana kulitjindja ruvara rwendi.Mokukwama nombudi ozina womukeke ava kwazuhva evango eli monosayitunga nokoTV.Age yipo katokwere kukazuguma mukeke ogu kevango olyo,yipo mwenya evango adive asi ngapi narugana.Evango eli kwakara novanona vana siki kesere sinzi sawo nonsigwe ntani woruhepo.Age kapi kahere nampili kuzamweka mukeke ogu yiyo kamuretere kwange,eyi yina kumoneka asi konyara 500 zovanona vakara apa yizo mpito vagenda zoozo.Edina lyomukeke ogu yige “Uitani”kutanta asi nani paruka morudamara -nama. Nononkambadaronye odo varugana ozina kuna kulikida asi mukeke ogu ngaparuka.Tara tupu muwaawa age hena mukanguki.Ame nani murera nawa ngwendi moomu tupu ani rere vange.Yimo ana kutanta Afrikaaner oku tamenyuna.Ogu ana hingire konyonga zendi munona ogu kava retere pevango yivike hamboumwe yina pitipo. Munona ogu kava yamuzugumine pevero lyevango eli,yipo asi nina hepa kudiva asi yinke kayamuzuguminine, kava mugwene pevero age nekende lyendi eli ava tura masini.Afrikaaner kuna kupura vafenkenda varandereko mukeke ogu makehe noyikoverero yovakeke nomasini ngoso.Age kuvhura kumugwana kofunguna ezi 0812705370.Siruwo nye esi evango eli lina kara asi kuna zura vanona vanasiki ko500 kuna kudirukira pepi nosure zaAugeikhas zakara moKatutura,kuvhura kudiruka mvhura zeezi nsene asi Karunga ana panga.