KATIMA MULILO – Likwambuyu wa Linzila Veikko Nekundi ubonisize maswabi ahae kuamana ni tiyeho ya kuyahiwa kwa mukwakwa wa Bukalo- Muyako mwasikiliti sa Zambezi. Na ize tiyeho ikatisa kekezo ya sinyehelo.
Hane apotezi mukwakwa Lamubulo, likwambuyu nalemuhile kuli kalulo yapili yaprojekiti yalibima zelishumi ibonahala kusialela hahulu mwamulaho. Kuyahiwa kwa mukwakwa watala kuzwa Bukalo kuliba munzi waTololi nekukalile la 11 Liatamanyi 2025.
Nihaike kuli projekiti yabolule bamashumi amalalu kabasilezi neswanela kufela mwa mweli ya Liatamanyi 2026, patisiso ibonisa kuli ki 40% yamusebezi ofelile. Nekundi nafile mamela kuli tiyeho yeo ikona kutisa muisilingo, kamaikuto akuli kuzwelapili kwa tiyeho ikona kufumisa baelezi.
“Muyahi halyeha, kufofaza musulo waluna kakuli hakulyeha hahulu, kona mokutulela,” nekubulezi likwambuyu. Naekelize kuli, bakeñisa kuli baelezi balifiwa kakuya kapesenti yateko yaprojekiti kaufela, tiyeho yeo iekeza masheleñi abafiwa. “Haiba sinyehelo inge iekeza kuisa kubolule bamashumi aketalizoho, kutalusañi hala masheleñi amuswanela kulifiwa, kana kikuli ki lipesenti zene, zeketalizoho kapa zelishumi?” abuza.
Bayemeli bakampani yaEnigma Engineering ni Bicon Dream JV baikalabela hala tiyeho, nebaize kunela hahulu kwa pula, limembala za sicaba baba pila mabapa nimo swanela kufita mukwakwa babasika lifiwa kale, hamoho cwalo ni butata bwa kuyaha libaka zamatibelelo ni kututa. Limembala za sicaba bona bakupile kuli yafilwe kuyaha mukwakwa alundulwe.
Yene ili muzamaisi wasikiliti sa Zambezi ya pumuzi famusebezi Raymond Matiti naize muyahi wamukwakwa hana hande libelekiso zetokwahala kuli apete musebezi. Maikuto ahae naikabezwi ki membala wasicaba Brenden Kabuku, yana ize limembala zasicaba bahakanyeha kana kampani yefilwe musebezi ykona kukwanisa.
Matiti nasusuelize mubuso kuyolisa sikwata sa cwale nikubeya muyahi yakona kueza musebezi, kusebeleza sicaba sa Bukalo, Muyako, Silumbi ni Mutikitila. Nekundi nahupulisize sikwata kuli mubuso niha ushangula purojekiti, mukwakwa usiala kuba wasicaba. Naitamile kuli uka ikambota ni bazamaisi mwa likolo la hae nikufumana tatululo sakata ni taelo yelukela, kwa kampani yebona za kuyaha mukwakwa kuli taba itatululwe. Poto yalikwambuyu kiyeñwi yalipoto zahae zakutatuba mapurojekiti amikwakwa mwa sikiliti.
–Nampa
