Lahya Nashuuta

KHORIXAS – !Hūbǁûb Nangolo Mbumbab ge Kuneneb di !hao!nāsi ǂgaeǂgui-aona ge ǂgan, in ǂhanub ǀkha sîsenǀhao tsî ǁnās !nâ-ū !aroma ǁîn ǀhûhâsigu di !gomsin ǂâisa ra ǂnûi-aihe !khaisa. !Hūbǁûb ge !hao!nāsi ǂgaeǂgui-aon, ǀkharisi tsî !ā!nāsi ǂgaeǂguidi tsîn ǀkhāb ge Khorixas !nâ ūhâ i ǂnûs tawa ǁnā ǂgansa ge dī. ǁNā !ǂnûs !nâb ge Mbumbaba ǀgaisa ǁhōn ǀhûhâsiga ra tsâkhān ǂnamipe gere ǂanaǂanhe.

 ǁÎb ge ǁnāpa !hūba ra tsâǀkhā ǂhâǂhâsa ǁhōn tsî ǁkhāti !hao!nāsi ǂgaeǂguidi !hūb tsî ǁkhāsiba omkhâs !nâ nî ǀhuru dana !ereamxasib tsîn ǂnamipe ǁ-în ǀkha gere ǁgamǁare. 

Mbumbab ge ǁîn ai gere ǀgonǀgon!gaon ge ǀkhurub, sîsenūhes !aroma !gâi ǂâu tama hâ daogu, khoen tsî !aubǀgurun ǁaegu ra hâ !omgudi, omn tsî ǂkhari-omn mâsigu tsîna, ǁîn ǀkhab ǂhanuba ǀgaisa ǁgoaǂuisa ūhâse. Mbumbab gere mîsa !oab ge ǀkhuruba hoan xab ǂhanuba ǀgaisa ǁgoaǂuis ase ūhâ !gomsi. 

Nēsis kōseb ge ǂhanuba ǁaupexa N$700 miljun marisa sîsenū hâ ǀkhurub di huib ǂûna ǁama tsî ǁîna khoen hîa nî hōse in tawa sī-ūs !aroma. 

Ai!âb ge ǀaro tsî ge mî “Nausa da ge a mîbahe, ǁnāpan noxopa ǀnî khoena hâ hîa ǀkhurub huib  di ǂûna noxopa !khō!oa tamana, !gōsase, ǁnān hîa îbe-îbe a !garo !âgu tsî sīhesa kaise a !gomgu !nâ ǁnān hâna. Tita ge !hao!nāsi ǂgae-ǂgui-aona ra ǂgan, nē khoen xa !nāsa ǂansa hō tsî ǂgiǂgosi ǁhûi!nâǂharidi tamas ka i o ǀkharisi berosa nî ǂanǂansa, î-i tā ǀgui khoe-i tsîna !âs xa ǁō”. 

ǁNā ǂnûs !nâb ge Damaran di gaob, Dr  Justus ǁGaroeba !Hūbǁûba ge mîba, ǁîb ǀhûhâsib buruxase ǀkhurub xa !khōhe hâsa tsî ǁkhāti ǀgaisa ǁgam-i !nubusib tsîn ǀkha ǀhaohâse. 

“Ti ǀkhomas hîa ta ǂhanub ǁga ra dīs ge, hanab ga ǀkhurub mâsiba !gâi ǀkhāba !oa nî unusens kara,  ob ga sida ǂgari-aona ûitsamaxūna a ǁamaba tsîn ga ǂgarib ǀkha a ai!gûsa,” tib ge ge mî. 

Noxopab gere ǂgan !khais ge, ǂhanub ga ǁguiri-aona nē ǀkhariba !oas tsîna a ǂgaesa, !gōsase -ǁnān maindi !âb !nâ hâna, in sîsenga ǂkhamkhoen !aroma ǂnuwi. 

“Nē soab ai ta ge sida ǂhanuba kai gangansa ra mā, !omn ǀkha sîsens ǁkhāǁkhākhâis senters hîab ge Khorixas !nâ a kurus !aroma tsîb ge, nē senters !nâ-ūn ǂkhamkhoena ǁîn ûiga nî !gâi!gâi ǁkhāsiga ǁkhāǁkhāsen tsî nî ûiǂui !khaisa,” tib ge gaob ǁGaroeba ge mî. 

Haiǁom ǁaes di senior ǀawemā-aob, John Haneb ge Mbumbaba ge mîba, !nāsa ǀhûǁarebese ra ǂgari-aihe !garo!ādi, aiǁgause Seringkops, Balaikas, Toevlungs, Mooisplaas, Werdas tsî Nuxas hâdi khoen xa ǀoa!nā hâ tsîn nē mâsib !aroma !naua!noexase oresa ra ǂhâba !khaisa. 

Swartbooi !Hao!nāsi ǂGaeǂguis di Christine Klazens tsîn ge !auga!hūsi ǁguiri-aon hîa ǂnamipeba xu hā mineralna ra ūǂuin, !hao!nāsi ǂgaeǂguidi a ǀūsen ǂnamipe gere !gaesen.  

Mbumbab ge ǁawosasiba ǂgaeǂgui-aona mā tsî ge mî, ǁîn di !gaesendi go a ǁnâuhe tsî !ereamxasiga tani hâ ǂgaeǂgui-aon -ǁga nî ǂhā!kharuhesa, ǂhâbasa ǁ-gamǁaredi tsî sîsenxa kaihes !aroma.