Loide Jason
WINDHOEK-Omupresidente Hage Geingob okwa kaleke okumonathana naakalelipo yehangano lyaaniilonga ndyoka hali ithanwa Mineworkers Union of Namibia (MUN).
Omupresidente okwa li e na euvathano naaniilonga mboka opo ya monathane naye potundi ontimulongo yongula yOmaandaha ashike mbaka inaya holoka pethimbo onkene Geingob okwa ti ita vulu okutegelela ethimbo ele omanga mboka ya pula a ye moonkundathana naye inaaya thika.
Ashike oshi li omukalondjigilile kutya aluhe ngeno omutse gwoshilongo oye ta tegelelwa ihe haye ta tegelele aatalelipo , ngaashi sha holoka mompito ndjika.
Okwa holola kutya aaniilonga yokomina yedhina Swakop Uranium oya ti kutya elelo lyehangano ndyoka lya tumbulwa pombanda inaya tsa kumwe nayo opo ya vule okugwanitha po iipumbiwa yawo pankalo yiilonga.
Ombapila ndjoka ya shainwa kaaniilonga ye li 112 ndjoka oyo ashike ya shangelwa Omukuluntuwiliki mombelewa yapresident Moses Pakote oyo ashike ya lesha opo nduno mboka ya li ya enda pamwe napresitende noshowo aakundaneki ya za kiikundaneki ya yooloka oya li ya lalekwa opo ya shune kiilonga mbala omanga osheendo shoka inashi ya.
Mombaapila ndjoka omwa hokololwa kutya oshigongi shika pokati komutse gwoshilongo naakalelipo yehangano ndyoka nashi kalekwe mpanga.
Noshowo aakalelipo mboka ya ka monathane mpanga naaniilonga omanga inaya monathana nompresitende.
“Ngele ehalo lyetu inali gwanithwa, otatu ka tokola kutya aakalelipo mbaka oya ya ashike momitse dhawo na hatse ya kakalela po, osho ombapila ndjoka ya hokolola ngaaka,”.
Oya ti woo kutya ngele ehalo lyawo olya gwanithwa nena oye na okutsa kumwe e taya kundathana omaudhigu gawo ngoka ye na opo ya vule okuya po netokolo ndyoka tali opalele aakalelipo mbaka noshowo aaniilonga yoyene.