MoVenduka-Nayinye eyi kayihorokerere mohotela zomoSwakopmund momazuva 30 gaPembankuru, paapa Paulus Kapia kazumbanesere marumbasano gokukondjera liva roungwenya kwamukwawo zendi Siegfried Kaperu mosikando somurongo monda mwina ava rwanene. Kapia kahandukire apa kava geve yitundwamo asi ana zumbanesa, kumwe nokuhokona liva roungwenya kwanguuru gomukunda Erongo Samuel Nuuyoma, ogu kakere mevango lyokurwanena kumwe naministeragona govadinkantu, yiviyauka yanavenye, maudano nompoPohamba Shifeta.
Age kapi kakere nompepo zina zoudano zokutambura asi nsene vana kufundu vana kufundu,morwa mukaro nye gwangoso vakwami vendi yipo kava tamekere kuzuguma makende mombunga eyi kayininkisire udano naunye upire kuhaga nawa.
Yimo ana kutanta ministeragona Pohamba Shifeta. Mbunga ezi zakarerapo Boks vana kutumbura asi Namibia Boxing Control Board kavalipaterere monda masiku ogo vatare asi sihorokwa sangesi kusirugana ngapi,nye munasipundi ogu kakwatereremo maudano aga Kelly Nghixulifa katente asi etokoro nava liturapo yipo valikide uzuni asi sirongo saNamibia nani ngapi asi rugana vantu vaso wokupira kusikisamo veta.
“Ame kanimwene ekende lyobira lina kuveta ministeragona apa ana kutunda mevango lina ava rwanene”.
Nayinye eyi kayireteserepo Kapia kumwe novahameni vendi yimo ana kutanta Nghixulifa ogu kakere asi yige mutareli marumbasano aga. Mokukwama mwendi age Nghixulifa yininke nampo kayikere namo peke morwa Kapia kayazumbanesere unene paapa kayauyungilire noku fingilire mukwawo.
Age kapi katente nawa-nawa asi yinke kauyungire nye navenye kava yimwene asi eyi ana rugana kapisi yiwa kovantu ava kava kere mevango lina lyokurwanena.
Age kumwe nokunkweura liva kwanguuru gomukunda Nuuyoma. Esi kasikere sikando sauvali omu Kapia ana kuzumbanesa ano mukwawo zendi ogu Kaperu age kwavena murongo narumwe, omu garwana murongo nantano kuna kumoneka asi kwazumbanesa tupu rune. Ame kapi kani gazarere asi yininke yangesi kuvhura kuhoroka mosirongo setu omu tuna kukondja asi ngano tukulike Boks.
Kapia kwahamena koruha rokoDurban Andreas Stable ano mukwawo zendi kwahamena koruha rwa Nestor Sunshine Tobias Boxing and Fitness Academy.
Shifeta katente asi kayikere tupu erago morwa kwato mukarelipo goBox pontambo zokuzeruka ngano Namibia tava mutjaruramo momarumbasano goBox,morwa mukaro gomuntu gumwe tupu.
Ministeragona kapi ngarugana epuko lyangesi hena morwa ana mono asi mwaKapia mwato mukaro goudano.
Shifeta tagwedako asi nguuru gomukunda muntu vana kuvhumadeka unene age hena mukondi kuna fana ngwendi oguhwe wokumureta.
Ame nani ndindira ekona-kono eli vana kurugana woruha romaudano morwa nina vape nare sirugana vakonakone.
Nguuru gomukunda katente asi age gahepa tupu kutara eyi nayihoroka morwa Kapia karugene epuko age mevango lyokurwanena.
Age kapi katente asi kapi kapa kere vakungi nye morwa eyi kayihorokere monda hena muretesipo gwayo kakere muntu ogu karumbasanene. Apa katuhere asi ngano tutunde pevango lyokurwanena hawe ame kani tereko tupu ekende kosipara sange novantu vana kuzigira asi umbondo.
Ngapi natukara noumbondo ngwendi asi ose katu kere vagavi nopenta ndi asi vagendesi marumbasano aga?
Ose yirugana yetu kayikere tupu yokugava liva komufundi.
Apa katupulire asi Kapia kapi karuganesere nonkango dokutuka navenye kavatente asi age kahokweneko tupu liva oru karukere momawoko ganguuru.
Ame kani mutere nawa-nawa momeho nokutara omu ana kuruganesa rutu rwendi mokuuyunga.Mokutarurura kwange kanilirongereremo asi nani yinke novhura kurugana mosihorokwa sangesi.