Mitili gomomukunda horowero gwaZambezi kavamupere matengeko morwa kutoona muharwa, etengeko mosimaliwa sokusika ko N$27 000 ogu kamutwere kovahahende vendi morwa kumuswaura.

Mitili gedina Mukwae Zibiso katwere Linda Namasiku Sauzuo, Docus Eliziel Sauzuo ntani Lumba Kamwi omu navafuta silinga vana kulipakerera zokusika ko N$720  898 morwa kukora ntani kumona kanyando ndi asi kukora, kehandu, ntani rutu rwendi morwa kwatukuka unene, morwa yamuzonagura unene eyi yina kumuninkisa apire kukara nomukaro gomuwa nampili membo ndi koyirugana, rutu rwendi ngesi kuna kara tupu asi gokunwa nomutji disesupike kukora ntani kuporeka yironda yendi. 

Age katente asi ogo vana kulipatana nendi kwawizire koyirugana yendi posure kumwe nokuyamusindagura pwahana konda nkenye ndi age kapi gamulimbwilire. Zibiso ntani Linda awo kwavaninkisa validive nokulihara morwa muntu ogu vana kudiworoka gedina Abel. 

Mupanguli Hannelie Prinsloon, ogu kakere asi yige ana kupitisira yipangura eyi, kagwene asi Zibiso kapi ana kulikida nawa nawa asi Docus na Kamwi nawo vamwe vana kara melikwamo lyangesi lyokumuswaura, makura awo kapi kavavagwene asi nawo vahamenamo. 

Mupanguli simpe kagwene asi Zibiso kuna kumoneka nawa nawa asi muntu ogu ganyanda unene, kuna kuzuvha kukora, garemana ntani muntu nye ogu ana kara asi kapisi pevega lyewa. 

Age katente asi vakarelipo vendi kapi yavatompoka mokureta umbangi wendi kweyi gafuta kouhaku wendi. Mupanguli katente asi nampili ngomu vatere asi yingapi garuganesa, Linda kuvhura yikare asi kwasandagwire tupu mukwawo pwahana konda, makura eyi kuna kutwaredera asi kuvhura akare nosirapotwa nye paveta kapi nayitanta Yuma nye age kuna hara vamufute. 

Age simpe katente asi Zibiso kwapaturura sirapotwa sezonaguro lyoyiweka yendi, yina kara asi mulyo gwayo kusika ko N$7 000. Age katente asi sipangura nasinye kuvhura kupura yimaliwa yokusika ko N$20 000 mokutara asi age kwakere nomarutu gavali siruwo oso yahorokere yokumusandagura.mupanguli yipo nye katokwere asi Linda gahepa kufuta yimaliwa yokusika koN$27 000 omu nayiligwederera nonopercenta 20% momvhura kutunda mezuva eli vana kugava etokoro lyangesi dogoro ngamane kuyifuta. 

Ntani kavamupere asi yimaliwa eyi gafuta mukwawo kohahende gahepa nayo kuyifuta. rrouth@nepc.com.na