Katima Mulilo
Musali wa myaha yemashumi amabeli kayeketalizoho, yapepwa mwa Zambia natamilwe Labutanu kwa Katima Mulilo kalibaka lakubulaya mbututu kuzwa fakupepa feela.
Muyahi wa sibaka sa naikahela sa Cowboy, nasikazibahazwa falibizo kufitela nako ya takambekwa fapata a muatuli wa mulao. Kanako yacwale usweli kuliswa ki mapokola kwa sipatela sa Katima Mulilo kafo usweli kuamuhela likalafo. Musali napepile mwana musizana wa bwina bwa 3.5 kg Labutanu. Nabulaile mbututu wa hae kakumutiba mumizo ni kumupumbeka mwa musima oneusikatunga mwatasi akota mwamachachani mabapa ni ndu yahae yebakopanezi ni kalibe yebapepwa ni yena. Mupokola ya bona zasizwale ni sichaba mwa sikiliti, Warrant Officer Kisco Sitali utaluselize ba Nampa Labutanu kuli, musali yo namatezi kwa sipatela kuyobata likalafo, ki kafo nekuizo limbululwa kuli nazwa fakupuluha.
Habuziwa lipuzo ki baoki, musali nalatuzi taba ya kuli nazwa fakupepa. Seo sitisize kuli baoki babize mapokola kuitenga mwataba mi aitumelela ni kuisa mapokola kwa libita. Mbututu napumbuzwi fapata amahe kanako ya 21h30. “Mulomo wa mbututu neukatezwi mubu mi meto ahae nakwalile. Na itumelezi kuli napepile ka 15h30 Labutanu musihali nihaike nasika talusa kafo napepezi teňi nikuli kisikamani senesiezahezi. Kacwale usweli kukantelwa ki mapokola kwa sipatela mi kutaluswa kuli umwamayemo amande. Utabe aisizwe fapata a muatuli wa mulao nako yatabe abile hande,”kwa talusa Sitali. U ize musali utalimani ni mulatu wa bubulai, kuyumba mulwalo ni kulubaluba bupaki.
Bo muuna ahae musali bapila kwa Zambia. Ba Nampa habasikafumana kale bupaki bwakuli sapilile nako yekuma kai mwa Namibia – Nampa.
Kuzekisiwa… Musali wa naha Zambia, wa lilimo zemashumi amabeli ni zeketalizoho utamilwe Labutanu kwa Katima Mulilo kakuakalezwa kuli nabulaile mbututu hazwa fakupuluha feela.