Sikiliti sa Zambezi hasiboniwa kuba munyako wakuliba linaha zaSADC, mwakukwalula nzila yalipisinisi, mubusisi wasikiliti sa Zambezi Lawrence Sampofu ufitisize manzwi ahae kulumelelana ni babañwi kuli museto waKatima Mulilo uhuliswe kuba museto wakuyema feela hañwi.
Ili kalulo yeka konahalisa kufita kwalibyana ni tekisano kabunolo.
Likwambuyu walitaba zakwande anaha viki yefelile naize konahaliso yatekisano hala naha Namibia ni Zambia, ikona kukonahala muuso ni linaha zefumaneha mbowela waAfilika halilemuha butokwa bwasikiliti sa Zambezi.
Nebabulezi manzwi awo kanako yamukopano wakuikambota one ezahezi viki yaale hala mutomo “Katima Mulilo munyako wakuliba SADC: Kukiulula Konahalo yalipisinisi mwasikiliti sa Zambezi.” Sikiliti sa Zambezi kimunyako kuliba linaha zambowela waAfilika ili Angola, Botswana, Congo, Zimbabwe, Malawi ni Tanzania.
“Mutomo wamukopano wo, uzamaelela ni kalulo ye yahana moluipumana. Sikiliti sa Zambezi sipotolohilwe kilinaha zeñwi,” nekubulezi Sampofu.
Kikalibaka leo naha Zambia ni Namibia neli lumelelani kutahisa kalulo yakuyema feela kwamuseto ulimuñwi kwa Wenela ili ose uzibahala Katima Mulilo kachenu.
Sampofu naize mulelo wakuyandulula nzila yasitima kuzwa Grootfontein kufita Rundu, kutaha Katima Mulilo niona notalimilwe, ili kubisa bunolo nikutiiseza pono ya Katima Mulilo kuba munyako wakuliba linaha zambowela waAfilika.
Naize kuyahiwa kwalinzila kikwabutokwa kuli mulelo wo ufitwe kuona.
Sikiliti sa Zambezi siluwile limbule zecwale kalitapi, njimo, bupoti, kulema likota ni mezi. “Museto wakuyema hañwi useli kulelwa, mi talelezo seli famayemo apahami.
Haukatalelezwa, kukakonisa matiraki kuzwelela maneku kaufela kuyema feela hañwi.
Kalulo yeo ika fukuza mubamba wakunyatela libyana,”nekubulezi Sampofu.