Shiki Kandjimib tsî Cecilia Iyambos

ǁAnǂgāsaben, Mutengo Mukuro !garo!ās, 10 kilometerga Rundus Aiǂoas !nâ ǁgoes din ge ǂhanub ai gere ǀkhoma îs -ǁîn di ǁgam-i tenksa ǀgūse ǁgoe ǁgamhōxū!khaib ǀkha !hûǁarehe in !anu ǁgame-e hō ǁkhā. 

Nē ǂgans go a ǂoaxaba !khais ge ǁnāpas ge Direktorats !Garo!ā ǁGammās disa ǂoa ge kurib di Hôasoreb !nâ ǀkhai!nâ tenksa a mâi xawe noxopa ǁgamhōxū!khaib ǀkha ǀhaoǀhao tamases khao!gâ. ǀGui -anǂgāsabeb, Alois Gendeb ge ge mî, ǀgui timî tsîs ge nē tenksa a hā-ūhes khao!gâs noxopa ǀoaǀoahes tsîna dī tama tsîn ǁanǂgāsabena ǀgūse ǁgoe !āba xu ra ǁgamxurisa. 

Nē ǁgam-i ge ǁkhāti a ǀurisa tsî kai ǁkhōǁkhōsasiba ǁîn ǂurusiga !khōǂgāba hâ. ǁAnǂgāsaben ra ǂgans ge in paipi hîa ǀgūse -ǁgoe ǁgamhōxū!khaib hîa !anu ǁgam-e ūhâb ǀkha nē tenksa nî !hūǁareba ǁguibahe. Nēs ge kai huib ase nî ī, ǁ-în di tenks ga Uvhungu-Vhungu projeks di kai tenks ǀkha a ǀhaoǀhaohe, o ǀguib -ǁîn ǁgam !gomsiba oresa nî hōbahe amaga. 

Uvhungu-Vhungu projeks di mûǂamaob Mabvuto Mwanzab ge MICT ǂhôare-aona ge mîba, ǁîn !kharu ge kurigu !nâ ǀnai ge aoǁgui hâ isa in ga ǁanǂgāsaben tenksa projeks dis ǀkha a !hû-ǁaresa, xawes nēsa ī tama ge isa, xawen noxopa a māsenxasa nēsa dīsa, hanas ga ministerisa ǁnā ǂhâbasa paiba ǁama tsî nî ǁguis karao. 

Nē !garo!ās hîa ǁaupexa 300 ǁanǂgāsabena ūhâs, ge tsauba ūhâ tama hâ tsî !garo!ā ǁgammās berosa xu -ǁgam-e ra hō. 

Morista Katulos nē !garo!ā beros !naka ǁgam-i tsî ǂkhari-omn mûǂams !ereamsa tani hâs ge ge mî, ǁîn texnise !gomsiba ǁnāti ī autob hîa ǁgam-e !garo!āde ra !naoǁnāpab ǀkha ge ūhâsa isa, xawen ge oresa ǁnā !gomsiba a hōba tsîn ge ǁanǂgāsabena ǂoa ge ǁkhâba xu ǁgam-e a hōtsoatsoasa. Katutlos ge ge ǂan!gâ ǁîn ge ǂgamamsensa !khō!oasa Uvhungu-Vhungus ǁanǂgāsabena xu ǁnāti  paiba ǁguibahes !aroma tsîs ge -îs berosa ǀnai nē kurib ǀKhūǁkhâb !nâ a ǁamaǂgan tsî noxopa nî !khō!oase !âu hâsa. 

Rundus ǀKharisi ǁhûi!nâǂharis awemā-aob Michael Shikongob ge ge mî ǁ-îb ǂansa tani hâsa nē mâsib ǂnamipe tsî sîǂkhanis tsîna ge xoasa în Uvhungu-Vhungus khoena paiba -ǁguibahe.