Iuze Mukube

Muyahi wasikiliti sa Zambezi, Sinvula Mwilima (31), yana lengilwe lilimo zelobañwi hala mulatu wakuzamaisa limbule ze silelelizwe, ufitisize liñolo la kuli taba yahae italimwe sinca mwa Khuta Yepahami.

Mwilima nafumanwi mulatu wakubata kulekisa manaka atou amabeli abuima bobulikana 6.55kg ateko yelikana N$5 989. Nafumwi mulatu hape kakuluwa lilama za lifolofolo zanaheñi zesilelelizwe hala Mulao Wapukelezo ya Lilama za Lifolofolo Zanaheñi ni Tekiso wabu 9 wa Silimo sa 2008, ono talimilwe sinca ka mulao wabu 6 wasilimo sa 2017. 

Nakile ahana kuitumelela mafosisa kwamakalo amuzeko wahae, mi naize nabihile manaka kumutu yabeleka mwalitaba yakubukeleza limbule za naheñi kuli azibise mapokola. Natamilwe mwa kweli ya Njimwana 2021 kwa Malengalenga mwa silalanda sa Linyanti, mi nakile afiwa mulatu mwa Khuta Yeketahani mwa Katima Mulilo walilimo zelishumi kazepeli, mi zetalu neli beezwi kwatuko. Mwilima ulwanisa feela koto yana filwe, kamaikuto akuli ibukiti, isikami, nikuli itisa maikuto akumakala. Mwa liñolo la hae la kulwanisa koto yana filwe, muyemeli wahae Joseph Andreas, ubulela kuli khuta nepalezwi kutalima bupaki sakata, inge kuli Mwilima nafumanwi mafosisa lwapili, unyezi mi una ni bana bababeli babaitinga kuyena, natusa lubasi lwahae kakuba ndui, mi naitukiselize kulifa mulatu olikana N$3 000 kuisa N$4 000.

Andreas ubulela kuli kungondwama kwa khuta hala butuna bwa kezo, nikukungulela kwa tuko kwa bupaki, nekutisize kuli bafitise liñolo lakuli taba italimiwe hape. Ubata kuli koto ifukuzwe kutisa mwa lilimo zene, nikuli zepeli libeelwe kwatuko. Mubuso uyemelwa ki Johannes Mwatondandje Kalipi, ulwanisa kupo yeo, uhatelela kuli koto iwela mwa maata akhuta mi ikona feela kubeelwa kwatuko kambe nesika zamaiswa hande. Khuta Yepahami ilibelezwi kufa katulo yateni la 10 Yenda 2025. -mukubeiuze@gmail.com