Komeho tupu vakature epongo lyovanangesefa ava vahaMra kupungura yimaliwa eli vana kugazara lika kareko moNamibia uministeli wonongesefa una gava nare marondoro asi vakansela wonomukunda nava wonodoropa vaharugana yininke yoyi dona eyi nayitjida vapunguli ava. Egano lyokuninka asi epongo eli ayaligendese presidente Pohamba namukwawo zendi gwaSuid Afrika Thabo Mbeki kuna kupapara nompito edi natu pita yipo tukulike ekonomi lyetu ntani nomu natuvhura kugwanena vantu vetu yirugana.Ava vana kundindira pepongo eli kuna kara vanangesefa wopomukunda ntani wopontambo zokuzeruka ntani nombunga edi dakara doyimaliwa rambangako nava vana kara nonoporojeka.Epongo eli kuna kwama kweli lyakereko mo2000,eli lyakakarere koBaye.Omu vatere nzira ezi vana kutumbura asi Trans Kalahari,Trans Caprivi zipite moTrans Kunene high way ezi vana kugazarera kugwanekedesa Baye naMaputo. Dogoro ngesi uministeli nare una gwana asi noporojeka dokusika ko48,yido dina tundu kovakansela makura ngano digwane mbatero yipo vatware ekuliko kovantu konomukunda.Ano noporojeka edi dahepa kudemenena kounafabrika,nondima,vadinguli,nomfi,nokonomina.Ministera gonongesefa nomarandesero Immanuel Ngatjizeko katente asi nsene vayirugana oyo hawe yokukara nonompepo donongwa kovapunguli dikareko nonzira donongwa,mavango gonongesefa,naga gokutunga vantu nokupopera asi yahahorokako yoidona kovantu vetu.Age kayiuyungire eyi pepongo eli kali kereko moutano lyovakansela,varugani wokuzeruka monomberewa dovakansela ntani nedi damuni.Age simpe kava tanterere asi eyi yokufutisa mema ndiro ntani rutjeno neyi yokupira mavango gokutunga kuvhura kutjilisa vantu ava vana hara kureta ngesefa modoropa ozo.Age simpe kava hundilire asi twahepa kuwizapo nomagano gomawa age gana kuninkisa asi vanangesefa vawize ntanio vantu vetu melikwamo loyo tavagwanenemo yirugana. Eyi yokuninka asi nkenye siruwo kusivana asi ruhepo nonzara age katente asi sirongo sahepa kuwizapo nomagano ngwendi mokuninkisa vantu vetu valikwate ukwawo novanangesefa vakura yipo vagwanenemo uwa yimo hena ngoso sirongo sina kukura.Simwe soyo kuna kara ukumwe vamwe tava kara nevhu vena vanayirongo awo tava reta yiruganeso,ntani hena twahepa kugurumwisa ndando zetu zevhu unene lyomodoropa,yimaliwa yokugwedako ngwendi mutero ntani yezazu kuna kukanduka unnene kupitakanena.Namibia naso sirongo simwe sina kara momarumbasano kumwe novamusinda mekuliko kapi tatu ninki nkenye apa asi nawanawa nye siruwo oso yininke yetu ndiro unene kupitakana yovamusinda.Hamutjanga gokukarereramo mouministeli wonongesefa Andrew Ndishishi katente asi vakansela wonomukunda ntani wonodoropa vahepa kuliwapayikira vene vageve evhu kuvantu yipo asi vanangesefa ava vana hara kuwiza vagogomoke. Sihonena kageve asi nsene muna ngesefa ogo ana hara kureta ngesefa zendi nye kuna kuya kuta vantu wovanzi vamupe evhu mawokowoko.Kuvhura morugane ngoso.ministera age kuna kara tupu noudigu wovarugani ava vana kara tupu asi awo yawo kunyoka kuza koyirugana ano nombunga dawo nado kuna kukorangeda asi nyokeni kuza koyirugana.Age kahundilire nombunga davarugani asi vadeure vantu vawo kapisi vavape mukumo asi vahaza koyirugana ndi asi varuigane eyi yapira kuwapera,yipo dogoro vakazonagure veta zovarugani ano novanangesefa nawo tavatjira kuyaruganenamo ngesefa zawo.Namibia Investment Center Mugendesi gona gwazo Fredie ! Gaoseb,katente asi egano lyokureta epongo eli moNamibia kuvhura kureta uwa mosirongo,epongo eli kuna kugwana mbetero konombunga edi dakara moNamibia dalikwatakana kumwe nepangero. Nbampili ngomu yina kara asi kapisi nomukunda horowero nadinye vana kuyakarapo pepongo eli WBSDI,nye awo kapi ngava vhura kuruganese mapongo gavene Namibia gahepa kupapara yiruganeso nayinye yipo asi marongikido aga gasikemo.Epongo eli kuvhura kureta malitjindjo gomanene omu ana kukondja Namibia asi akure asike oku yina kara yirongo yimwe,yipo nage atunde moudigu ou.Kuna karako noSDIs asi ngano kukare noporojeka ngwendi Namibie Corridor,Maputo,development Corridor,Limpopo Valley,Beirra Development ntani zekefuta.