MOVENDUHKA-Muhameni gombongarero zanavenye gekuto Ben Amathila katente asi kamarada Sam Nujoma gelike gokuvhura kureta uwa mombunga ezi yipo ose wokuhupako tudjobwane mpora zosirongo esi.Apa kageve siuyungwa sendi zokuhulilira mombongarero zanavenye,Amathila katente asi posiruwo esi tuna kara ngesi Nujoma gelike gokuvhura kureta ukumwe mombunga ezi,ezi gagendesa dogoro ngesi.Ame kwafumadeka Nujoma asi guhya muhoko mokutumbura muntu asi guhya koyili warugana eyi ngava pira kudivara yipo asi eyi garugana kapi ngatu yidivara. Age kageve marondoro asi vaNamibia vahatarerera mbunga zaSWAPO zife ndi zilihane momununu morwa eyi ngayitulisa Namibia akare sirongo sina kupayima.Namibia naso kuna kara simwe soyirongo yaAfrika.Nsene SWAPO akara neparu lyedona sirongo nasinye tasimono siponga.Muntu ogu gamwena katente asi mbunga zaSWAPO naNujoma varugana unene vareta sirongo dogoro papa sina kara ngesi neina morwa ruhepo norunyando oru vamona vanakadi novanagara wosirongo esi.Simpe kagwedereko asi mbunga zaSWAPO kuna kara simpe noyitumbukira mokugendesa sirongo esi pwahana utjirwe.Muntu ogu gakere nare mombongarero zanavenye katente asi sirongo kuna kugendapo nawa kutunda tupu kemanguruko dogoro nomvhura edi 17,mpora noupolitika kwayikeverera.Mokukwama mwendi elituromo nekungo twayisikisamo.Ministera gwanare gongesefa nomarandesero katente asi kwahana yimaliwa,kapi takukara nondja ndi uturo,ntani nkenye gumwe ogu ana kara mevango lyoyirugana tagazara kurugana yoyidona yipo asi agwane nondja ndi uturo.Age simpe katente asi koveli vaNamibia ava vana kara asi eparu lyawo kapi lina wapa vana hara asi ngano liwape. Mokureta epopero olyo kovantu ava vana kara asi kapi ava rugana ndi woruhepo vahepa kuvaronga ndi kuvadeura yipo asi kapi tatu vhuru kuyirundurura nampili ngapi vana kutupura ndiro twahepa kuyirugana.Amathila katente asi muntu-muntu eparu lyendi vahepa kulipopera ngano kuvhura varugane yininke yoyidona eyi yina pilire kuwapera kuyirugana muntu ndi tayifana ngwendi asi yikoroma yina danenepo.Muntu ogu gakara asi eparu lyendi kuna wapa ndi kuna kulikeverera nage kuzuvha asi yinke vana hara vantu.Vaholi zendi mombongarero zanavenye kava muharere erago.Nora Schimming-Chase gwaCoD ogu kamutumbwire asi Boetie Ben age kwamoneka ngomuntu galituramo moyirugana yombongarero zanavenye nonokomitiye edi vamuhorowera.Ose natu mupumbwa nokutanta asi tuna zumbanesa muntu gomagano.Age kamuharerere erago meparu lyendi ntani ngamudiworoka narunye narunye neharo nouwa wendi ngwendi utovara wochocolate.Silyo sombongarero zanavenye goSWAPO, Hidipo Hamutenya kamufwatwilire asi Ben mugara gamwena ogu gatjira nkenye apa kukara moyininke yoyidona.Age mugara gomuwa gamwena,Hamutenya ogu gayagusire evango lyaBen lyouministeli wonongesefa yimo ana kumutanta ngoso. Amathila mugara gomasanseko ano yiyo kamuharerere eparu lyewa moukaro wendi.Nkuru ministera Nahas Angula katente asi Amathila ependa gakondjerere sirongo esi simanguruke noumpitisili wendi.Age kamutjangwilire asi mugara apurakene ogu gahara kulituramo kulikunda dogoro vagwane ekohonono.Nkuru ministera katente asi vaNamibia vahepa kulipopera komapiyagano nokupira kulizuvha.Amathila ogu ana kara ngesi nomvhura 69,katente asi age simpe takara silyo sopoliti birozoSWAPO nosilyo sokomitiye zontjima-ntjima zoSWAPO.Age takalituramo mounandima nokukatjanga eparu lyamwene.