WINDHOEK-Aakwanezimo momukunda Otuwala moshikandjohogololo shaKatana oye li ya haluthwa sho mwene gwomukunda ngoka, Timotheus Kalimba a landitha po oshipambu shepya lyawo komukalimo gulwe gwomomukunda tuu ngoka.
Oshipambu shika oshepya lyameme Kristina Metusalem ngoka e li omukalimo gwomomukunda ngoka okuza momumvo 1974.
Okwa hokololwa kutya sho omathanekululo gomavi gahugunina ga ningwa momumvo 2016 momukunda ngoka , mboka ya thaneke oya thaneka epya ndyoka inaali igwana po mokaalita hoka oshoka oshipambu shimwe osha kala ashike shi na oopala ihe kasha na ondhalate.
Sho nduno ooyene yepya ndyoka ye shi mono sho okaalita kepya lyawo ke ya nena oya ningi onkambadhala okuya kaathaneki mboka opo ya vule oku ya pa omayele kutya otapa ningwa ngiini oshoka epuko olyaathaneki.
Nguka omukwanezimo ngoka a eta omulombo gwoludhi nduka koshikundaneki shaKundana okwa hokolola kutya oya ninga onkambadhla okuya kumwene gwomukunda Kalimba opo e ya pe ombapila ndjoka taya fala kombelewa yoshilongo ya wape oku ka thanekululwa ihe ngashingeyi ombapila ndjoka Kalimba okwe yi tindila .
“Sho nduno twa lombwelwa kutya otashi vulika tu tendululwe nena otwa yi kuKalimba ngoka a tindi thiluthilu okugandja ombapila ndjoka tayi pulwa opo epya lyetu lyi tulwe mo mokaalita hoka. Ihe nguka okwa tindi thiluthilu ndele ta longitha nokuli iitya ya honga sho a pulwa,” Osho omukwanezimo ngoka ina hala edhina lye lyi tumbulwe a hokolola ngaaka.
Ashike sho Kundanaa a popi naKalimba, Kalimba okwa hokolola kutya ye ina tindila ombapila onkee okwa landitha po epya ndyoka oshoka kalya li mokaalita kegumbo lyontumba.
Ashike gumwe gwomaathaneki mboka ya li ko pethimbo lyoshiningwanima shoka Petrus Ananias okwa koleke kutya oshipambu shoka oshomukalimo ngoka a kala po nale okuza omumvo 1974 onkene ke shi kutya omolwashike ye na okukala ya yekwa epya lyawo molwa ashike sho inaali thanekwa nawa pethimbo ndika.
“ Ngele epya inali thanekwa li ihwa po opu na uupu okushunithwa mo opo li kale lya gwana po . Ashike ngame kandi shi kutya omolwashike ngashingeyi shi li omukundu kaakalimo mbaka.
Kehe ashike aakalimo ya pewa ombapila kumwene gwomukunda kutya epya oshipambu shoka shawo moshili nena kape na uudhigu,” osho Ananias a hokola ngaaka.
Shoka tashi nyuwitha omakutsi mehokololo ndika ooshoka kutya Kalimba poshipambu shoka okwa tula po nale omukwashigwana ngoka a tula po nale nokuli ondhalatae ndjoka ya taaguluka modhalate onkwawo ndjoka ya kala po nale.
Ashike omonakadhona gwaMetusalem, Helena Johannes okwa hokola kutya shoka oshi li she ya limbililika noye wete kutya meme gwawo ota kuthwa epya ndyoka omolwaashoka oku li omukiintu na ke na oonkondo dhokukondjitha omalenga noshowo oomwene gwomukunda opo ya gandje oshipambu she.
“Onkao ndjoka ngashingeyi oya falitha meme moshipangelo sho a monika elondo lyombizi, ya londa ya pitilila oshoka okwa kala nokwiipula sha pitilila .
“Opwa ninga mwene gwomukunda ngoka oha longitha omalaka ga honga mokuya mookundathana natse uuna tatu pula kutya omolwashike e na okukutha meme evi ndyoka a kala nokulima omimvo odhindji.
Ngashingeyi katu shi kutya na tu ninge ngiini oshoka katu na ombelewa inatu lyata sigo okundjoka yelenga enene lyoshilongo tatekulu Ndilimani Herman Iipumbu,” osho Johaness a hokolola ngaaka a kengela omahodhi.
Okwa hokolola woo kutya namwene gwoshikandjo osho tuu shoka Abner Nuule ita kwathele onkalo ndjoka oshoka aantu sho taya yi kuye ye ke mu pele ekwatho oshoka mwene gwomukunda ina hala okukwathele oku li ashike te ya tumu kumwene gwomukunda ya za nale noomwenyo dha lindimana inaaya yelelewa komayamukulo ge.
Nuule okwa lombele Kundana kutya ye ihaga ndja oombapila nomapya omapulo agehe naga ye kuKalimba ngoka oye e li mwene gwomukunda na ngele Kundana okwa hala uuyelele wa gwana naye hoka ku na epya opo a ka pule .
Sho Kundana a ningi onkambadhala okupyopya nelenga enene Iipumbu ongodhi inayi toolwa po sho ya dhengwa yo woo inayi landulwa.