OKONGO- Mwene womukunda Onehanga vati okwa taatawa moilonga eshi a landifa omadu shi e li paveta omanga mwene womukunda Oshamukweni okwa li a kufwa moilonga pokafimbo eshi naye a landifa po omadu. 

Mwene womukunda Oshamukweni paife okwa shuna moilonga shaashi okwa yandja ombili. 

Elenga linene ta li wilike oshikandjo shaKongo, Ester Nakale okwa koleka onghundana ei onghela pefimbo a kwatafana naKundna. 

Oovene vomikunda aveshe ove li moshitunda shaUkwanyama. 

Nakale okwa yelifa ta ti ombelewa yaye oi na oufemba neenghono nokukufa mwene womukunda moilonga ngeenge ite li umbata nawa. 

Okwa hokolola ta ti okwa kala nale lokulombwela mwene womukunda Onehanga opo a xulife po okulandifa eenhele domadu shaashi ina shi pitikwa ashike okwa kala nokutwikila. 

“Okwa landifa po onhele yedu paulingilingi shaashi ponhele ina pa pitikwa okukala ovanhu. Onhele oye pangelo shaashi oya nuninwa i kale youlifilo woimuna,” ta ti. 

Nakale okwa ti mwene womukunda ou natango okwa ninga epuko eshi a landifa po edu kondado yopombada. 

“Edu oli na ashike oN$600 pamufyuululwakalo wetu ashike paife oovene vomikunda otava kengelele oshiwana nokulandifa omadu kondado yopombada. Okwa ninga epuko,” ta ti. 

Nakale okwa ti paife omukunda Onehanga owa mona mwene womukunda mupe nokwa nangekwa nale. 

Okwa yelifa ta ti mwene womukunda Oshamukweni naye okwa landifa po omadu ehe na epitikilo. 

Nakale okwa yelifa ta ti moshikandjo shaKongo omuna eenhele doulifilo dihapu ashike ka pena omunhu a pitikwa okuninga po eumbo laye. 

“Oovene vomikunda ava ova longifa omukalo woumbudi. Ova ya kondje yomilandu da tulwa po kepangelo nokelelo letu,” ta ti. 

Okwa ti ombelewa yaye otai li ufa komilandu da tulwa po kepangelo osho yo kelelo laUkwanyama. 

Okwa ti ovanhu vamwe paife otava nyenyeta tava ti eedalate davo otadi ka hanaunwa po kepangelo ashike ovo vene va ka landa omadu koovene vomikunda pamukalo woumbudi. 

“Ova kengelelwa koovene vomikunda davo. Otwe va lombwela nale kutya otava ningi oshiinima sha puka. Paife epangelo ota li ka kufa onghatu,” ta ti. 

Eshi a kwatafana naKundana, Wilbard Haukongo ou e li mwene womukunda Onehanga noku li paife a kufwa moilonga, okwa hokolola ta ti ota lundilwa. 

Haukongo okwa yelifa ta ti okwa ninga mwene womukunda Onehanga omudo 2021. 

“Onda hanga po nale ovanhu va ninga po omaumbo avo va pewa omadu kwau a li nale mwene womukunda,” ta ti. 

Okwa ti okudja omudo a ninga mwene womukunda okwa yandja ashike omadu ane. 

“Ina ndi landifa omadu kondado yopombada. Ka shishi sho shi li,” ta ti. 

Haukongo okwa ti okwa kufwa moilonga po kafimbo omudo wa dja ko mu Anguste oule weemwedi nhatu. 

“Okudja opo ina ndi kwatafana vali nelenga lange fiyo onena. Ondi li ashike meumbo, ame ina ndi lombwelwa kutya olye ta kwafele ponhele yange,” ta ti. 

Okwa ti fiyo opapa ina lombwelwa ngeenge opena omunhu mu pe a ninga mwene womukunda Onehanga. 

Omutoolinghundana okwa ninga eenghendabala dokudengela mwene womukunda Oshamukweni ashike ongodi yaye oya dima. 

Omaandaxa ongudu yovanhu ya dja kOkongo osho yo kOmundaungilo ova ninga ekangha lopambili kEenhana tava nyenyeta eshi eedalate davo domakove tadi ka hanaunwa po kepangelo. 

-fhamalwa@nepc.com.na