Mwene womukunda Onawa popepi nOngwediva, opamwe novanhu vakwao vavali ova kwatwa po eshi vati vali tava kendabala okuyandja omikanda doipupulu komukwashiwana waAngola opo a mone oufemba waNamibia.
Beata Sheehama weedula 62 (mwene womukunda), hamushanga womukunda Onawa Elizabeth Annita Booysen weedula 26 nomunailonga wokehangano loNamRa Josua Nghipuhafo Haunawa.
Omupopiliko wopolifi moshitukulwa shaShana Inspector Thomas Aiyambo okwa hokolola ta ti Sheehama naBooysen ova holoka momhangu yaShakatati Etitatu. Haunawa naGabriel Handuukeme Didalelwa oo ali vati ta kongelwa omikanda, ova holokele monhangu momafiku 09 Mei neudo shaashi ovo kwa li va kwatwa po tete.
Sheehama okwa pewa oeli futile mo modolongo noN$400, Booysen oN$800 omanga Didalelwa naHaunawa veli kondje koshimaliwa shoN$1000 keshe umwe.
Oshibofa shavo osha udulilwa komafiku 26 Juli 2022 omanga ta kuningwa omakonakono.
Aiymbo okwa hokolola ta ti omudo wa dja ko muDesemba Haunawa, Sheehama naBooysen ova kendabala oku yambidida Didalelwa eshi ve mu shangela eembapila doipupulu opo a ye keembelewa doikwameni, a ka pewe oufemba waNamibia. Okwa eshi ovanambelewa va ninga omakonakono ova mona kutya Didalelwa okwa pewa eembapila doipupulu naashi osha eta opo Haunawa nava kwao va kwatwe po.
Opolifi oya hokolola tai ti ovatamanekwa okwa va shanga Omukanda tadi ti Didalelwa okwa dalelwa moNamibia opo a mone oufemba noupu. Omulumenhu ou vati Omuangola kuyadi novadali vaye aveshe Ovaangola.
Aiyambo okwa kunghilila oovene vomikunda opo va xulife po okukala tava longo noumbudi wokukengelela noku yandja omikunda doipupulu.
“Oshiwana nashi shi kale sha kotoka opo shiha longifwe moinima woumbudi,” Aiyambo ta ti. – fhmalwa@nepc.com.na