Ongudu yopapolitika yoBody Christ Party oya patululila oshibofa mwene womukunda Oshimbidi moshitukulwa shaHangwena shaashi vati a tuma ovanhu va ka hanaune po oundjuo vavali vongeleka yoshiveva yoHouse of Healing Ministry.
Oundjuwo ova hanaunwa po omwedi wa dja ko konima eshi vati mwene womukunda a lopotelwa kutya ongeleka otai eta edundakano momukunda waye.
Omupresidende wongudu yoBody Christ Party Festus Thomas okwa ti ongudu yavo otai pula mwene womukunda oo a kale a kwatwa po diva shaashi vati ina longa pauyuuki eshi a tuma ovanhu va hanaune po oundjuo. Kakele kaasho, mwene womukunda oo vata ota tataa ongeleka yavo i kale yadja mo momukunda waye.
Thomas okwa ti ongeleka oyo ya landa onhele yedu kumwene womukunda Mekondjo Tapapu ashike vati mwene womukunda ina hala ongelela i kale ya tunga oundjuwo wokulongifa kovakwaneongalo.
“Out na eembapila da yela nawa twa pewa kuTapapu, otwa futa nale oshimaliwa shonhele yedu ashike paife ina hala vali ongeleka i kale momukunda waye,” Thomas ta ti.
Okwa weda po ta ti okudja omudo wa dja ko Tapapu okwa kala ina hala ongeleka yavo i kale momukunda waye konima eshi ovanamukunda va kala tava lundile ongeleka yavo kutya otai topola oushiinda.
“Out na oupyakadi woovene vomikunda hava hanauna po eengeleka doiveva unene tuu moshitukulwa shaHangwena nOshikoto. Onghee ongudu oya kalela po eengeleka doiveva monooli otai kala ya katukila mwene womukunda keshe onghatu ou ta hanauna po eengeleka doiveva odo di li koshi yongudu yetu,” Thomas ta ti. Eshi a kwatafana naKundana mwene womukunda Oshimbidi Tapapu okwa ti ongeleka oyo kakwa li ya pewa oufemba wokuningwa momukunda waye.
Okwa yelifa ta ti ongeleka oya longifa eenghono eshi ye likufila onhele yedu mekove laumwe womukwaneongalo ndele tava tungu po ongeleka yavo.
“Ovakalimo womomukunda wange ova kala tava nyenyeta efimbo lile kombinga yongeleka ei molwaashi oya kala tai eta edundakano momukunda. Ovanhu paife kave na vali ombili momukunda eshi hava kala tava lombwelwa kongeleka kutya otava liwa kovashiinda shavo noshoyo kovakwapata vavo,” Tapapu ta ti.
Onghee okwa ti naashi osha eta opo ovakwashiwana va ka hanaune po oundjuo vongeleka shaashi inava hala ongeleka i kale momukunda wavo. Okwa yelifa ta ti yee ina tuma ovanhu va ka hanaune po oundjuo ashike ovakwashiwana ovo ve li ominge nongeleka ovo vene ve liunganeka va ka hanaune po ongeleka.
Okwa weda po ovadali momukunda ohava kala tava nyenyeta eshi ounona ihava kala vali momaumbo pefimbo lomakonakono molwaashi hava kala ashike ve li kongeleka efimbo keshe. Onghee okwa ti naashi osha eta ounona vahapu va dope omudo wa dja ko shaashi ohava kala alushe ve li kongeleka.
fhamalwa@nepc.com.na