Daogu ǂGaeǂguis (RA) ge ra ǀaweǁgui ǁaupexa N$230 miljunsa daogu hîa nē ǀgaisa ǀnanub xa ge ǂkhôahega sao ra ǀkharigu aroma sîsenūsa: Oshana ǀkharib, Ohangwena ǀkharib, Oshikoto ǀkharib, Omusati ǀkharib tsî Kunene ǀkharib hâga.
Daogu ǂGaeǂguis di Dana Sîsenǂuira Mâisab, Conrad Lutombib ge ǂoa ge wekheb Donertaxtsēs aib ge ūhâ i dî!nâǁgamǁare-i !nâ nēsa ge ǂanǂan.
Nē sîsengu ge ǀaweǁguiba !oa ǁari go ǂnôa i Mantaxtsēs ai nî tsoatsoase i, î gu daoga nē !goaxa Pasxab sâǁaeb !aroma ǂhomisa, !âubasenhe rasa !oan ǂgui !gôagu khoena nē daoga nî sîsenūs a xui-ao.
Nē sîsengu ge sao ra kontaraktern xa nî dīhe, ǂgaiǀons ai Kambwa ǂHarugub, Otesa, Nexus, Unique, Eponga, Emirates tsî Road Contractor ǂNûiǂgās tsîna. Lutombib ge ǂgom!gâba nē sîsenna nî dī ǂharugugu !nâ ūhâ, nē sîsenni ǀkhan mîǁguisa ǁaeb !nâ nî toa !khaisa.
Nēsis kōses ge RAsa N$30 miljunsa māǂui hâ ǂōǂōsib ase daoga !gâi!gâi!nâs !aroma. Namibiab a ǂhabase gu ge daoga ǀgaisa ǀnanumâsib xa ge ǂkhôahe.
Nē N$30 miljuns ge daogu !nâ ge ǂnû āde ǂganams tsî dâu!khūhe ge !âga ǁkhawa kurus tsîn !aroma ge sîsenūhe, nēs ge ǁaeroba nî hâ !nam daoba, !gaunas ge a khôaǁnâs khao!gâ ǀAeǁgams tsî ǀAnes hâra ǁaegu kurus tsîna !khōǂgā hâ.
Nē maris ra ǂgaihe, xawes ge ǁîs a kai maris hîa !hūb di daoga ǁkhawa ǀoasa sîsenūs !oa oahā-ūsa N$467.1 miljuns ai ra ǀnōǀnōhe. “Korodisi persentgu sada !hūb di daogu dib ge kaise gaxu kuriga hâ tsî ûiǁaeb âgu tsîna !kharu hâ.
Nē !khais ge daogu !haese a ǂkhôahe ǁkhās mâsiba !khōgā hâ, !gōsase ǀgaisa ǀnanub ǁaegu !nâ,” tib ge ge mî.
Ai!âb Lutombiba ge a mîs ge ǀnanub ge ǀgaisa ǂkhôaba !kharaga daogu ai dīsa, !gōsase ǀKhomas, Hardap, Oshanab, Ohangwenab, Kavangob, Kuneneb tsî Zambezi ǀkharigu !nâ. Lutombib ge noxopa ǁgui!ā tsî gere mî, nausab nē daogu sîsenna a ǁgariǁgarisa, xawes RAs di mariǂnûiǂuis 2024/2025ǁî marikurib disa N$1.3 biljun maris ai mâ, ǁîsa xus N$1.29 biljunsa Daogu !Khōdanas ǂGaesa (RFA) xu ra hā tsî N$15 miljuns ǀguisa ǂhanuba xu ra hāse.
“Nē ǂnûiǂuisa maris ge N$4.1 biljunsa noxopa ǂhâba hâ hoa daoga ǂgaoǀkhāsa sîsenūs !haros ai hā-ūs !aroma,” tib ge ge mî. –vkaapanda@nepc.com.na